Gringo akashaya

Kwayedza

SHASHA yemitambo yemadhirama neny’ambo dzinosetsa – Lazarus “Gringo” Boora – akashaya nezuro mushure mekunge arwara nechirwere chegomarara.

Ange ava nemakore 47 ekuberekwa. Gringo ange arwara kwenguva refu izvo zvakaona utano hwake huchidzikira chaizvo mumasvondo adarika. Achitaura neKwayedza mangwanani eMuvhuro uno, Taurai “Gringoldinho” Boora anotsinhira nezverufu rwababa vake. “Zvakaoma, baba vatisiya. Tiri kurwadziwa zvikuru nekutisiya kwavaita. Zvinhinji tichakuzivisai,” anodaro.

Pana Gringo tarasikirwa: Gweshegweshe

nyaya naAbel Ndooka

IMWE shasha yemadhirama anosetsa – William “Gweshegweshe” Matenga – anoti nyika yose yarasikirwa zvakanyanya nerufu rwaLazarus “Gringo” Boora.

Gringo ashaikira muchipatara chemuHarare nezuro mangwanani uko ange achirapwa mushure mekurwara kwenguva refu.

Gringo naGweshegweshe vakatanga kushanda vose mugore ra1989 vari muchikwata cheScreen Talent Drama Club ndokuita zvirongwa zvakawanda, zvimwe zvaibuda paterevhizheni nepawairesi.

Asi vose vakazonyanyoita mukurumbira pavakatanga kubuda padhirama Gringo iro rakanyorwa naEnock Chihombori.

William ‘Gweshegweshe’ Matenga

Gweshegweshe anoti, “Handina kana neremuromo, Gringo atisiya. Ndakaenda kunomuona mazuva mana adarika uye handina kumbofungira kuti anotisiya nhasi (Muvhuro).

“Gringo munhu aishanda nesimba, aida basa rake uye aiziva zvaaiita achibatsira vamwe kuti vakure mune zvemafirimu nemadhirama.”

Gweshegweshe anoti rufu rwaGringo rwauya apo iye nevamwe vaanoshanda navo vange vari pakati pekubika rimwe rinonzi “Gringo Troublemaker Two”.