Abel Ndooka
KUCHANGE kusingadanwe anonzwa kutanga nemusi weSvondo uno kuKuwadzana Area Zone Soccer League uko zvikwata zveko zvichatatsurana mumutambo weNew Africa Super Cup Knockout Tournament 2024 Edition.
Mutambo uyu uchaona zvikwata 15 izvo zvinokwikwidza muKuwadzana Area Zone Soccer League zvichirwira mibairo yakasiyana.
Mutungamiri weKuwadzana Area Zone Soccer League – Karen Rambai ‘Sir Stoko’ Mbisvi – anoti mutambo uyu wakakosha zvikuru nekuti uri kubatsira kubika vatambi vechidiki avo vanokwikwidza muligi ravo.
Anoti nekuda kwemutambo uyu, vatambi vazhinji vave kutorwa nezvikwata zvinotambira muCastle Premier Soccer League, naizvozvo vanoukoshesa.
“Mutambo wedu mukuru weNew Africa Super Cup wadzoka. Mutambo uyu wakakosha zvikuru nekuti kuburikidza nemutambo iwoyu, gore negore tiri kuona vatambi vedu vakawanda vachitorwa nezvikwata zvikuru zvinokwikwidza muPSL.
“Saka tiri kukurudzira zvikwata zvichatamba mumutambo uyu kutanga svondo rino vagoshanda nesimba kuti vahwine nekuti pachange pane varairidzi vezvikwata zvakasiyana zvikuru vachauya vachiona mitambo iyi ichitambwa,” akadaro Sir Stoko.
Chikwata chichahwina pamutambo uyu chichawaniswa yunifomu itsva, mukombe nemenduru dzegoridhe kuchiti chikwata chichapedza chiri pechipiri chichawanawo yunifomu nemenduru yesirivha.
Mitambo yechikamu chekutanga chemutambo uyu ichaona Golden de Boys ichisangana neTransdirect FC, Stingers ichitatsurana neKaturuturu FC, Blue Hunters yorovana neLegends, Jayz One vs Orlando FC, City Rovers vs Real Stars FC, SDA vs Stallions FC uye Exploders ichatamba neNewstars FC.
