Kingstone Mapupu
MAPURISA eZimbabwe Republic Police (ZRP) kuMasvingo ari kutsvaga hama dzemurume akatsikwa nemotokari ndokufa, mutyairi wacho achibva atiza pachinhambwe che152 kilometre mumugwagwa weMutare-Masvingo.
Mutauriri wemapurisa kudunhu reMasvingo, Inspector Kudakwashe Dhewa, vanoti tsaona iyi yakaitika nemusi wa9 Chikunguru nenguva dza8.30 manheru pakabva pafa murume uyu.
“Tine mutumbi wemurume akatsikwa nemotokari nemusi wa9 Chikunguru, motokari yakamutsika ichibva yatiza. Murume uyu aiva akapfeka jaketi dema, juzi reyellow netirauzi reblue. Mutumbi wemurume uyu wakachengetwa muimba yerunyararo pachipatara cheSilveira Mission Hospital,” vanodaro Insp Dhewa.
Vanoti vanhu vasiri kuona hama yavo yechirume vanogona kuenda kunotarisa mutumbi uyu voona kuti hausi wehama yavo here.
“Kune vanoda kuziva zvakawanda pamusoro penyaya iyi kana kupa mashoko kumapurisa, ngavaridze nhare kuna Inspector Felistas Gwara dzinoti 0773 435 768 kana kutaura nemupurisa ari kufeya nyaya iyi Constable Faith Matema pa0775 719 109. Tiri kutsvaga mutyairi aiva nemotokari yakatsika murume uyu, tinoda kuti asungwe asangane nemhosva dzake kumatare edzimhosva,” vanodaro Insp Dhewa.
Vanokurudzira vatyairi kuti kana vaita tsaona vasatize sezvakaitwa nemutyairi uyu.
“Kune vanhu vane ruzivo rwetsaona iyi nezvakaitika, vachiziva mutyairi nemotokari, tinokumbira kuti vasvitse mashoko kumapurisa. Nerimwewo divi, ikurudziro yedu kuti kana vanhu vachifamba, vafambe nezvitupa kuitira kana paitika tsaona seizvi vakurumidze kuzivikanwa,” vanodaro Insp Dhewa.
