Kingstone Mapupu
VAKURU vemapurisa kuGweru Urban nekuGokwe, kudunhu reMidlands, vadzika mutemo unorambidza kutengesa kana kufamba wakatakura zvombo zvinokuvadza zvinosanganisira matemo, tsvimbo, mapanga nerekeni zvichitevera kuwanda kwenyaya dzekupondana nekukuvadzana munzvimbo idzi.
Mutemo uyu wakaturwa kunzvimbo yeGweru Urban naOfficer Commanding Gweru District, Chief Superitendent Enock Chishiri pamwe naChief Superitendent Tsitsi Chikono vanova Officer Commanding Gokwe District.
Zvombo zvarambidzwa kuonekwa zvakatakurwa kana kutengeswa zvinosanganisirawo mabhemba, makano, mapakatwa, mapfumo, matombo nezvimwe.
Munhu wese anotyora mutemo uyu weSection 4(1) of the Maintenance of Peace and Order Act (Chapter 11:23) anogona kugara mujeri kwemwedzi mitanhatu kana kubvisiswa mari yefaindi.
Chief Supt Chikono vanomirira dunhu reGokwe kunzvimbo dzinosanganisira kubva kurwizi Munyati kunosvika kuNgondoma, Mutukanye, Gwenya, Chemagora, Gababe, Mateme, Nyaje, Tachi, Ndarira, Kana, Gadza, Mukoka, Zhomba, Guyu, Nenyunga neSimuchembo.
Chief Spt Chikono
Nzvimbo yeGweru inotungamirirwa naChief Spt Chishiri inobatanidzira kubva paMidlands State University kusvika kuFletcher High School, Dayslesford, Coolmoreen Plots, Greenvale, Ridgemont, Hertfordshire, Montrose Plots, Woodlands, Mkoba, CSC nekumwe.
Chief Supt Chishiri vanoti kudzikwa kwemutemo uyu kwakonzerwa nekukuvadzana nekupondana kwevanhu kuchishandiswa zvombo izvi izvo zviri kukanganisa runyararo nemagariro akanaka eruzhinji.
