Kwayedza
Zvikomborero Parafini
MURUME ane makore 32 okuberekwa wekuChipinge, uyo svondo rapera akabatwa aine tsoko muAfrica Unity Square muHarare, nemusi weChitatu chino akabhadhariswa faindi ye$15 000 yekutyora mutemo weParks and Wildlife Act nedare reHarare Magistrate Court.
Mutongi Tafadzwa Miti akatongera Zachariah Moyana chirango chekugara mujeri kwemwedzi mitatu iyo yakazosendekwa yose padivi paine chitsidzo chekuti haapare imwezve mhosva yerudzi urwu mukati memakore mashanu anotevera.
Kana akakundikana kubhadhara faindi ye$15 000 iyi, Moyana achagara mujeri kwemwedzi miviri.
Moyana akasungwa aine tsoko iyi muAfrica Unity Square nemusi weMugovera wadarika mushure mekunge atadza kuburitsa magwaro anoratidza kuti ane mvumo yekuchengeta mhuka yesango iyi.
Tsoko iyi inonzi inokosha $262 500.
Muchuchisi munyaya iyi aiva VaThomas Chanakira.
