Kwayedza
NYAMA yezvikanganwahama inonaka zvikuru sezvo zvisina mafuta akanyanya.
Svondo rino VaSimson Lukasi vekuBindira vanotsanangura mamwe mabikirwo ezvikanganwahama.
Zvinodiwa:
Chikari kana poto, zvikanganwahama, munyu, mafuta, hanyanisi, mhiripiri nematomatisi
Mabikiro:
Cheka zvikanganwahama uchizvivhura mukati wobvisa tsvina yose.
Zvigeze zvinyatsochena wozviisa muchikari kana mupoto.
Isa chidimbu chekomichi yemvura nemunyu wakaringana.
Zvikwatise kwemaminitsi makumi maviri.
Kana mvura yapera, isa twumafuta twushoma uchikanga.
Chekerera hanyanisi nematomatisi woramba uchikanga kusvika zvaibva.
Unogona kuzoisawo mhiripiri kana uchiifarira.
Wozodii?
Kana zvaibva, chigadzirira kuzviruma rurimi nekunakirwa.
Zvikanganwahama unogona kuzvichachura wodya zvakadaro, kana nesadza jena, remhunga kana rezviyo. Nakirwai nemhuri muri pazororo reGoredzva.
Sunungukai kutumira zvamunoda kuti zvibude pachirongwa chino panhamba dzinoti +263 713 411 281
