Abel Ndooka
MURAIRIDZI weSimba Bhora – Tonderayi Ndiraya – anoti zvikwata zvinokwikwidza muCastle Premiership zvave kutoziva kuti pamusha pavo kunhandare yeWadzanayi Stadium, kuShamva musha mukuru uyo “Unochohwa-chohwa munhu”.
Kubva mwaka wenhabvu uchitanga kusvika parizvino, Simba Bhora yatamba mitambo 10 iri pamusha payo ndokuhwina misere ikaita mangange miviri.
Izvi zvinoreva kuti Simba Bhora haisati yambokundwa iri pamusha payo.
Zvikwata zvaenda kuWadzanayi Stadium zvikabva zvine chibodzwa zvinoti TelOne neHerentals izvo zvakanoita mangange neSimba Bhora.
Muhurukuro neKwayedza, Ndiraya anoti kuvhurwa kwakaita nhandare yavo yeWadzanayi Stadium mwaka uno kwabatsira zvakanyanya.
“Hatidi kunyepa, kuvhurwa kwakaita nhandare yedu yeWadzanayi kwabatsira zvikuru matambiro edu nekuti tiri kuwana rutsigiro kubva kuvatsigiri vedu, izvo zvinove zvinosimudzira.
“Zvimwe zvikwata zvave kutoziva kuti kuWadzanayi kunochohwa-chohwa munhu hakumihwe-mihwe.
Zvishoma zvikwata zvakauya kuno zvikabva zvine zvibodzwa izvo zvinoti Herentals neTelOne chete, zvimwe zvese tiri kungodambura.
“Kana muri kutambira pamba penyu munofanira kuona kuti matora zvibodzwa zvese,” anodaro Ndiraya.
Mwaka uno, Simba Bhora iri kudzingirirana neFC Platinum kutora mukombe wePSL izvo zviri kuona mavhiki akasiyana zvikwata izvi zvichichinjana kuenda pamusoro pelogo.
Parizvino FC Platinum ndiyo iri kutungamira ine zvibodzwa 45 kubva pamitambo 23, kuchiti Simba Bhora ine zvibodzwa 44 kubva pamitambo 23 zvekare.
Svondo rino, Simba Bhora ichange iri pamusha payo apo ichasangana neBulawayo Chiefs.
Ndiraya anoti kutenga kwavakaita vatambi vakawanda kwasimudzira chikwata chavo.
“Isu chishuvo chedu kuti mwaka uno tipedze tiri pazvikwata zvepamusoro asi kana mukana wekuhwina ligi ukavhurika tinotourwira.
“Tiri kufara nepatiri iye zvino, asi chatinoziva ndechekuti mutambo uchiripo. Tinofanirwa kuramba tichishanda nesimba mumitambo inotevera kana tichida kuhwina mukombe wePSL mwaka uno.
“Zvikwata zvakawanda zvinotodawo kunge zviri patiri iye zvino saka hatifanirwe kuvarairwa,” anodaro.
Mune mimwe mitambo yePSL iriko svondo rino, FC Platinum iri kunanga kuSakubva kwaMutare uko ichanosangana neBikita Minerals, kuchiti kuBulawayo kune Bulawayo Derby iyo ichaona Chicken Inn ichitatsurana neHighlanders musi weSvondo kuBarbourfields.
