Kwayedza
Kingstone Mapupu
MAPURISA eZimbabwe Republic Police (ZRP) anoti asunga mumwe mudzimai nenyaya yekupondwa kwemwana wekwaMangwende, kwaMurehwa, uyo ane mutumbi wakazowanikwa wakabviswa musoro, makumbo nemaoko.
Izvi zvinotevera kusungwa kwevamwe vanhu vaviri nekuda kwenyaya yekupondwa kwemwana uyu.
Tapiwa Makore (Jnr) – uyo aive nemakore manonwe ekuberekwa – anonzi akapondwa nababamukuru vake uye sazita Tapiwa Makore (Snr) vachibatsirana nemufudzi wavo wemombe anonzi Tafadzwa Shamba uye vaviri ava vakatomiswa mudare nekuda kwemhosva yavari kupomerwa iyi.
Mutauriri wemapurisa munyika, Assistant Commissioner Paul Nyathi, vanoti mapurisa akasunga Maud Hunidzarira (42) nekuda kwekupondwa kwaTapiwa.
“Apo tiri kufambira mberi nekuferefeta nyaya yekupondwa kwemwana wemakore 7 wekwaMurehwa ainzi Tapiwa Makore, mapurisa asunga mudzimai anonzi Maud Hunidzarira. Mudzimai uyu atopinda mudare nekuda kwenyaya iyi.
“Tinoramba tichikurudzira veruzhinji kuti varambe vachitipa mashoko ane chekuita nekuda kwekupondwa kwemwana uyu,” vanodaro Asst Comm Nyathi.
Zvichakadai, mutumbi waTapiwa hausati wavigwa sezvo kuchiri kutsvagwa musoro wake pamwe chete nemaoko izvo zvisiri kuonekwa.
