Abel Ndooka
CHIKWATA checricket chemaChevrons chichasangana nechePakistan mumitambo mitanhatu inoti mitatu yeOne Day International nemiviri yeTwenty20 International Series iyo yese ichatambirwa kuBulawayo kunhandare yeQueens Sports Club.
Mitambo yezvikwata zviviri izvi ichatanga musi wa24 Mbudzi apo maChevrons nePakistan zvichabandana mumutambo weODI zvozosangana zvekare musi wa26 na28.
Mitambo yeODI ichipera, chikwata chemaChevrons, icho chiri kurairidzwa naJustin Sammons, chichabva chatanga kutatsurana nechePakistan mumitambo yeT20 izvo zvichaona zvikwata izvi zvichisangana musi wa1 Zvita, 3 na5 Zvita.
MaChevrons nemaShaheens zvakapedzisira kusangana mugore ra2022 kumutambo weICC Men’s T20 World Cup uyo wakatambirwa kuAustralia.
Mumutambo uyu, maChevrons akakatyamadza pasi rese zvichitevera kukunda kwaakaita maShaheens ne1 run mumutambo weSuper 12.
Zvakadaro, chikwata chemaLady Chevrons chichatanga kurwira kuenda kuICC Women’s Championship zvichitevera kuburitswa kwakaitwa mitambo iyo ichazotamba pasi pechirongwa cheFuture Tours Programme.
Zimbabwe ichatamba neSouth Africa, West Indies, Sri Lanka neIndia izvo zvichauya kuzotamba muno.
MaLady Chevrons achazoendawo kunotamba kunze nezvikwata zvenyika dzinoti India, New Zealand, Bangladesh nePakistan.
Achitaura pamusoro pekukwikwidza kuchaita maLady Chevrons mumitambo iyi, sachigaro weZimbabwe Cricket – Tavengwa Mukuhlani – anoti izvi zvichabatsira kusimudzira mutambo wecricket munyika.
“Zvinhu zvinofadza uye zvine mucherechedzo mukuru zvichasimudzira mutambo wecricket wemadzimai munyika.
“Kuve muchikamu cheICC Women’s Championship, kuchavhura mikana mikuru yevatambi vedu kuti vakwikwidze nezvimwe zvikwata zvikuru zvepasi rese izvo zvinobatsira kuti vasimukire mumutambo uyu.
“Takagadzirira kutamba mitambo iyi tosimudzira mureza wenyika yedu pamitambo mikuru yepasi rese,” anodaro.
Zvikwata zvese zvichatamba mitambo mina zviri pamusha uye mimwe mina zvichienda kune dzimwe nyika.
Pamusoro pezvo, mitambo iyi ichashandiswa kurwira tikiti rekuenda ku2029 ICC Women’s Cricket World Cup.
