‘Madhirama ngaadzidzise vechidiki’

17 Nov, 2022 - 10:11 0 Views
‘Madhirama ngaadzidzise vechidiki’ Tafadzwa 'RG Dicoma Anomala' Kanjirai

Kwayedza

Abel Ndooka

SHASHA yemadhirama, nyambo nemhanzi — Tafadzwa Kanjirai— ari mushishi kubika mutambo wake mutsva uyo anoti anoda kubata vechidiki ovarakidza gwara rakanaka rekufamba naro muhupenyu.

Kanjirai, uyo anonyanya kuzivikanwa saRG Dicoma Anomala, anoti madhirama anofanirwa kudzidzisa veruzhinji mararamiro ehupenyu hunoyemurika.

“Patinobika madhirama edu akasiyana, zvakakosha kuti ave akazara nedzidziso iyo tinopa vechidiki kuti vagoishandisa muhupenyu hwavo.

“Tikatarira vechidiki mazuva ano — hunhu hwavo, mapfekero avo nezvese zvavanoita — unotoona kuti vanenge vachitevedzera zvavanoona mumadhirama, kunyanya ekunze. Saka isu muno ngatigadzire eduwo madhirama toisa dzidziso yekuti vechidiki vedu vanotevedzera,” anodaro.

Panguva ino apo vechidiki vari kuswera padandemutande reSocial Media, anoti zvakakosha kushandisa zvirongwa izvi kuisa madhirama ekuti vechidiki vagodzidza pamusoro pehupenyu.

“Mazuva ano vechidiki havabve paFacebook, Instagram neTikTok, ndipo pavanoswerera pazvirongwa izvi. Saka ngatizvishandise tiise madhirama edu ipapo kuitira kuti pavanopinda pazvirongwa izvi madhirama edu vanokwanisa kusangana nawo,” anodaro.

Zvakadaro, RG anoti iye nechikwata chake cheBlue Sky Generation vari pakati pekubika dhirama idzva rinonzi Kushora Dare iro anotarisira kuti richabuda mumasvondo mashoma anotevera.

Share This:

Sponsored Links

We value your opinion! Take a moment to complete our survey