Tendai Gukutikwa
MUNYAYA inokahadzisa zvakanyanya, vanakomana vatatu vekwaMutare vanonzi vakapamba hanzvadzi yavo yakaroorwa ndokunoirodza nechisimba kune mumwe muporofita semuripo wekuchenura kwaakange aita musha wemhuri iyi.
Primrose Masiyakurima anonzi akanga akachengetedzwa nenzira yehunhapwa nemumwe muporofita semudzimai wake kwemwedzi yakati wandei ndokuzopunyuka achibva adzokera kumba kwevabereki vake.
Primrose paakamira pamberi pedare raSadunhu Chigodora nguva pfupi yadarika, akapomera Keddmore, Teddy naJames Masiyakurima mhosva yekumupamba.
Izvi zvakaitika mushure mekunge vatatu ava vadhonzera baba vavo, VaZondai Masiyakurima nababamukuru VaLeon Masiyakurima, kudare iri vachivapomera huroyi.
Zvakadaro, amai vavo Mai Alice Masiyakurima vakabva vafumura mabasa akaipa anonzi akaitwa nevanakomana vavo vatatu ava ekuripa muporofita uyu basa raakange aita nehanzvadzi yavo.
Vakachema zvakanyanya vachirondedzera zvakasangana nemwanasikana wavo.
“Zvinorwadza zvavakaita kumwanasikana wangu akaroorwa – vatatu ava vari hanzvadzikomana dzake vakamutora nechisimba vakamupa kumuporofita senzira yekuripa kuchenurwa kwemusha. Akanga auya kumba kwedu achitiona pavakamupamba. Aiva nekamwana kavakandisiira kuti ndichengete. Vakaramba kuzivisa murume wake kwaaive paakauya achimutsvaga.
“Ndakanetsana navo kwemazuva akawanda ndichida kuziva kwaive nemwanasikana wangu asi hapana chavakandiudza. Ndaichema ndichivakumbira zuva nezuva kuti vamudzose, asi vairamba. Nekuda kundinyararidza, vakabva vanyepa kuti vakaenda naye kuZvishavane kwavainge vamutsvagira basa. Kwapera mwedzi yakati kuti, mwanasikana wangu akafona achitiudza kuti akanga apambwa nehanzvadzi dzake ndokuroodzwa kune mumwe muporofita semuripo wekuchenura kwaakange aita pamusha pedu,” vanodaro.
Mai Alice Masiyakurima vanoti vakazoronga nemwanasikana wavo kuti angatize sei muhunhapwa hwaakange ari.
“Akazotiza ndokudzokera kumba, asi zvakanga zvisina kumira zvakanaka. Utano hwake hwakanga husina kunaka uye ndakatomupepa kuti apore. Akasvika kumba kuma 1 mambakwedza, pandakamuona ndakachema. Akanga asina simba,” vanodaro.
Mai Alice Masiyakurima vanoti nanhasi vachiri kutyira kuchengetedzwa kwemwanasikana wavo.
Vakakumbira dare kuti riyambire vanakomana vavo kuti vasashungurudze hanzvadzi yavo.
Primrose airatidza kupererwa, achizviti akashungurudzika zvakanyanya nezvaakaitwa.
“Ndicho chimwe chikonzero chakaita kuti ndisadzokere kumurume wangu, ndichiri kurwadziwa. Muporofita akagara neni achinditora semudzimai wake ndisingadi. Ndaigara ndakakiyirwa mumba uye ndaisaziva kuti ndoonana sei nevabereki vangu. Ndakatobatsirika mushure mekunge ndakumbira mumwe munhu nhare,” anodaro.
Kunyangwe zvazvo vamwe vose vomumhuri iyi vakabvumirana nezvakapupurwa naPrimrose naamai vake, hanzvadzikomana nhatu idzi dzakaramba dzichiti zvose dzaiva nhema.
Vakaramba vachisimbirira kuti hapana kana nguva yavakakundikana kubhadhara muporofita uyu uye vakapumha baba vavo huroyi.
Teddy, uyo anoita basa rekuchengetedza mhuka paGonarezhou National Park, anoti huroyi hwababa vake hwakakonzera kuti apinde mutsaona ina nemhuka dzesango gore rapera chete.
“Ko ndaigopambirei hanzvadzi yangu ndichiziva kuti yakaroorwa? Aya manyepo nekuti havaadi kuti tifumure nyaya dzehuroyi mumhuri. Hupenyu hahusi kutifambira zvakanaka kunyangwe tiri pabasa. Kana ndirini, ndakapinda mutsaona dzakawanda nekuda kwehuroyi hwavo. Vanoda kuti tife, ndosaka vari kuramba kuenda kun’anga nesu,” anodaro.
Mashoko ake akatsinhirwa naKeddmorre naJames vachitiwo vamwe vemhuri yavo vanozeza kubuda pachena maringe nehuroyi’ hwababa nababamukuru vavo.
VaZondai Masiyakurima vakarambisisa nyaya yehuroyi hwavaipomerwa vachiti vanodemba kuzvara kwavakaita vana vasina rukudzo navo.
“Ndinodemba kuti dai ndisina kuzvara vana ava. Vane zvivindi zvekundishora. Vanoramba kubvuma kuti ndini baba vavo vokubereka. Ko ndaigounzirei vana panyika ino, ndozovaunzira nhamo? Zvose hazvina maturo. Vakadyara mapanga mashanu matsvuku pamba pangu. Pavakatadza kubhadhara muporofita, vakabva vapamba mwanasikana wangu akaroorwa, ndokumuti ave mukadzi wemuporofita. Hanzvadzi dzine pfungwa dzakagadzikana dzinogona here kuita zvakaipa kudaro kuhanzvadzisikana yavo yeropa yakaroorwa?” vanodaro.
VaLeon Masiyakurima vanotiwo kufamba kuri kuita Keddmore, Teddy naJames kumaporofita vachinobvunzira kuri kupatsanura mhuri.
Headman Chigodora vakarasa mashoko ekuti Primrose akapambwa ndokuendeswa kumuporofita.
Vanoti kudai ichi chiri chokwadi, nyaya iyi yaifanira kumhan’arwa kumapurisa.
Vakakurudzira mhuri yekwaMasiyakurima kuti vafambe pamwechete kun’anga kana maporofita senzira yekutsvaga rubatsiro pane zviri kuvanetsa.
Nyaya iyi ichaenderera mberi nekutongwa mudare iri munguva pfupi inotevera.
