Kingstone Mapupu
MADZIMAI maviri nemurume mumwechete vekuMasvingo vakasungwa vachipomerwa mhosva yekuponda mumwe murume mushure mekukakavadzana naye mukombi pamusoro penyaya isati yazivikanwa.
Vakasungwa ava ndiAlouis Charles Dhangu Madembo (25) wekwaSabhuku Vanyoro kudunhu raMambo Nyakunhuhwa kuZaka, Rosemary Gave (29) wekwaGarapasi kwaMambo Chirumhanzu kuMasvingo naViolla Linia Tasara (34) wekwaSabhuku Musovi kwaMambo Nemauzhe kwaChivi.
Mutauriri wemapurisa kuMasvingo, Inspector Kudakwashe Dhewa, vanoti mhosva iyi yakaparwa nemusi wa27 Chikunguru nenguva dza11 manheru apo mushakabvu, Nyararai Siyavizwa (22), aibva kunhandare yeMucheke Stadium uko kwaiva nemutambo weChibuku Show.
“Siyavizwa akakwira kombi yerudzi rweToyota Hiace aine shamwari dzake dzaisanganisira Tinotenda Matiyo naAndrew Chapwanya vava kudzokera kumba.
“Siyavizwa akazotanga kukavadzana nevatatu ava vaivawo mukombi iyi. Murume uyu akazoburuka mukombi panosangana mugwagwa waKelvin Manjange naEnard Manyimo Gutsa pamwechete nemasahwira ake, panguva iyi akabva abatiranwa nevatatu ava vachimurwisa,” vanodaro Insp Dhewa.
Vanoti mumwe wevatatu ava akazotora chombo chakatesva ndokubaya Siyavizwa pamutsipa ndokutanga kubuda ropa zvakanyanya.
“Madzisahwira emurume uyu vakaedza kumubatsira nekuita First Aid asi akanga ava kubuda ropa zvakanyanya achibva angofira panzvimbo ipapo. Nyaya iyi yakazomhan’arwa kumapurisa, vatatu ava vachibva vasungwa nekuda kwemhosva yekuponda,” vanodaro Insp Dhewa.
Vanokurudzira veruzhinji kusiyana netsika yekurwisana kana vachinge vatadza kuwirirana asi kuti vatsvage vamwe vanhu vanogona kuvayananisa.
“Tinogumisira tava kurasikirwa neupenyu hwevanhu vasina mhosva nekukuvadzana munyaya dzinofanirwa kunge dzichitauriranwa,” vanodaro Insp Dhewa.
