George Maponga
VARUME vaviri vanove makororo avo vakabatwa nemhosva yekuba mari yevanhu vaive mubhazi raienda kuBeitbridge munaChikunguru apo vaive vakapakata pfuti, vakatongerwa kugara mujeri kwemakore 84 pamumwe nemumwe wavo nedare reChiredzi Regional Court.
Vasungwa ava ndiAshton Siziba (26) naPhinias Shumba (25).
Mutongi, Muzvare Judith Zuyu, vakapa mutongo uyu nekuda kwehumbowo hwakanyanya hwairoverera vaviri ava pamhosva yekubira vanhu vaive mubhazi iri mari inodarika US$8 600 neR62 000.
Kubirwa uku kwakaitika nomusi wa18 Chikunguru apo Siziba naShumba, vakakwira bhazi iri vachizviita vafambi, vakabatana nevamwe vavo vaviri.
Mumwe musungwa, Sauro Dadirayi (23), ari kutopika jeri mushure mekutongwa ari ega uye mumwe wacho achiri kutsvagwa nemapurisa.
Muchuchisi, Muzvare Tanyaradzwa Tinago, vakaudza dare kuti chikwata ichi chakakwira bhazi muHarare nemusi wa17 Chikunguru. Nguva dzava kuma2:30 mangwanani pedyo neRutenga mumugwagwa mukuru weMasvingo-Beitbridge, Siziba akaudza mutyairi kuti amire, ndokuburitsa pfuti yemhando yepitsol uye ndokumanikidza kondakita kuti apinde mukati mebhazi.
Shumba nevamwe vake vaiva vakabata mapanga eokapi vachibva varaira mutyairi kuti apinde musango nebhazi. Makororo aya akaudza vanhu 31 vaive mubhazi kuti aida mari iyo akapihwa.
Mushure mehumbavha uhu, vakaraira vanhurume vose kuti varare pasi uye ndokumanikidza vakadzi vaivemo kuti vabude kunze.
Makororo aya akazotiza nemotokari isina kuzivikanwa.
Mutongo wedare uyu unotaridza hudzamu hwemhosva yakaparwa uye une chinangwa chekudzivisa kuparwa kwedzimwe mhosva dzerudzi urwu.
