Makororo 6 emombe emumhuri imwe asungwa

13 Jan, 2025 - 10:01 0 Views
Makororo 6 emombe emumhuri imwe asungwa Mombe

Kingstone Mapupu

MAKORORO matanhatu emumhuri imwechete akasungwa nemhosva yekuba mombe ina dzinokosha US$1 600 kuChegutu, kudunhu reMashonaland West.

Inspector Ian Kohwera vanova mutauriri wemapurisa kuMashonaland West vanoti vakasungwa ndiPhilip Chirasasa (28) naLloyd Chirasasa (44) avo vose vanogara pamba pamwechete kuMbare National muHarare, kouya David Chirasasa (28) wekuStoneridge muHarare, Peter Chirasasa (32) wekuEyecourt Phase 2 muHarare, Abel Chirasasa (30) wekuKasimhure Village 2 kuKaroi naOwen Tinashe Mandizvidza Mutungamiri (25) wekuStoneridge zvekare kuHarare.

“Nemusi wa2 Ndira gore rino, varume ava munguva yemanheru vakaenda paPlot 8 nepaPlot 26 papurazi reChikanga kuChegutu ndokunoba mombe ina dzevarimi  vakasiyana. Murimi wekutanga, Forget Mupande (33) akamuka nguva dza0200 hours kunotarisa kudanga kwake akawana mamwe mapango ekuvhara pamusiwo wedanga abviswa ndokuzoona kuti mombe mbiri dzaiva dzabiwa,” vanodaro Insp Kohwera.

Vanoti Mupande akazotevera matsimba emombe netsoka dzevanhu achishandisa imbwa dzake ndokufamba kwechinhambwe chinoita mamita mazana mashanu uko imbwa dzake dzakabva dzatanga kuhukura.

“Mushure mekutarisisa nemukati merima sezvo hwaiva husiku, Mupande akaona vanhu vashanu vachimhanya vakananga kumugwagwa weChegutu-Chinhoyi uye paakasvika panzvimbo pavakabva vachitiza, akaona kuti makororo aya aiva auraya mombe ina apo mbiri dzacho dzaiva dzake,” vanodaro Insp Kohwera.

Mupande akabva azivisawo vamwe varimi vemunzvimbo iyi, kusanganisirawo naCharles Svevere (54) aivawo nedzake mombe mbiri dzaiva dzabiwa nemakororo aya.

“Vagari vemunharaunda iyi vakabva vaungana panzvimbo yaiva yaurairwa mombe idzi, Charles Svevere achibva aziva mombe dzake mbiri dzaiva dzauraiwa apa. Varimi ava vakabva vawirirana ndokutanga kutevera makororo aya vachishandisa motokari dzavo apo vakanga vataurira mapurisa eZRP ekuChegutu,” vanodaro Insp Kohwera. Vanoti pakudzingirira makororo aya, vakazovaona vachipinda mumotokari yavaishandisa yerudzi rweToyota Noah ine nhamba pureti dzinoti ADP 4440 iyo yaityairwa naPeter Chirasasa.

“Makororo aya akatyaira motokari yavo kunosvika mumugwagwa weHarare-Bulawayo ndokusvikotevedza mugwagwa unoenda kuHarare. Panguva iyi, mapurisa eZRP Chegutu vakazivisa mapurisa eZRP Saruwe avo  vakabva vaita road block. Vakavharidzira motokari yemakororo aya vakabva vasungwa vose vari vatanhatu, Makororo aya akazoendeswa kukamba yekuChegutu nyaya iyi ichifambira mberi nekufeewa,” vanodaro Insp Kohwera.

Mombe dzakabiwa dzose dzinokosha US$1 600.

“Semapurisa, tiri kushushikana nekuda kwekuwanda kwemhosva dzekubiwa kwemombe mudunhu reMashonaland West. Tinotenda veruzhinji nekushanda nesu vachitipa mashoko anoita kuti tisunge makororo uyewo tichitenda varimi venzvimbo iyi vakataridza huchenjeri hwekugara vachitarisa matanga avo nenzvimbo dzavagere nekushandisa nzira dzose dzekurwisana nekubiwa kwemombe. Izvi zvakaitwa nekuumba zvikwata zvemaAnti-Stock Theft Committees izvo zvabereka michero yakanaka yekusungwa kwemakororo uye nekuderedza kubiwa kwemombe,” vanodaro Insp Kohwera.

Vasungwa vatanhatu ava vakachengetedzwa vachimirira kuenda kumatare edzimhosva nekuda kwemhosva yekuba mombe.

“Makororo emombe anodzosera budiriro yenyika kumashure sezvo varimi vanoguma vasisina zvekurimisa nyika yopinda munzara,” vanodaro Insp Kohwera.

 

Share This:

Sponsored Links