Kwayedza
USAVI hwenyama yeguru hunonaka zvikuru uye tinowana mapuroteni kubva kwahuri asi hunoda kubikwa zvakanaka.
Svondo rino Farirai Mlambo wekuChipinge anotitsanangurira mamwe mabikirwo enyama yeguru zvemhando yepamusoro.
Zvinodiwa:
Poto, chikari, pani, matomatisi, munyu, nyama yeguru, hanyanisi nedovi
Mabikiro:
Tora nyama yeguru wocheka kuita zvidimbu zvakanaka.
Suka matomatisi nehanyanisi wocheka muzvidimbu zvidiki.
Gadza poto, chikari kana pani pamoto woisa nyama imomo nemvura shoma.
Rega zvimbokwata kwemaminitsi makumi mana uye kana mvura yapera, isa hanyanisi nematomatisi.
Ramba uchikanga kwemaminitsi gumi, wozoisa dovi zvipunu zviviri nemvura woramba uchikurunga kusvikira zvave kukwata segwata-gwata.
Raidza kuti zvaibva here wochizobura.
Nyama yeguru inogona kudyiwa nesadza jena, remhunga kana rezviyo.
Sunungukai kutumira zvamunoda kuti zvibude pachirongwa chino panhare dzinoti +263 713 411 281.
