Kwayedza
Abel Ndooka
VARAIRIDZI venhabvu vanoti Norman Mapeza weFC Platinum naJohanisi Nhumwa weManica Diamond nhasi vabhadhariswa faindi yeUS$1 250 nePremier Soccer League (PSL) mushure mekubatwa nemhosva yekutaura mashoko anozvidza sangano iri ayo akaburitswa mumapepanhau svondo radarika.
Muchinyorwa chabva kuPSL, mukushi wemashoko wesangano iri – Kudzai Bare – anoti pasi pemutemo wavo wechikamu 13 cheOrders Offence and Fines, mutambi kana murairidzi anoburitsa mashoko anoratidza kuti pane kakubiririra kanenge karipo mumitambo uye achitaura nevatori venhau kana padandemutande reSocial Media, izvo zvinokanganisa chimiro chenhabvu kana vatsigiri, anenge achipara mhosva.
“PSL yabhadharisa faindi varairidzi venhabvu vanoti Johanisi Nhumwa weManica Diamond naNorman Mapeza weFC Platinum nekutyora mitemo yePSL zvichitevera mashoko avakataura pakapera mitambo weMatchday 21 iyo yakatambwa svondo radarika.
“Vaviri ava vabhadhariswa faindi yeUS$1 250.
“PSL inokurudzira zvikwata kuti zvishandise gwara chairo rinotenderwa kana zviine zvinyunyuto pamusoro pevaridzi vepembe,” anodaro Bare.
Pakapera mutambo weDynamos neFC Platinum uri mangange 0-0 kuNational Sports Stadium, muHarare svondo radarika, Mapeza akati, “Mafree-kick apihwa Dynamos ndiwo ashandura mutambo, asi zvimwe zvose hapana zvekutaura.
“Kana muridzi wepembe achidaro, ndingati kudii? Mazvionerawo mega, maona zvange zvichiitika, saka moda kuti nditi kudii?”
Anoenderera mberi achiti, “Pakupera kwezuva unozosvotwa kana varidzi vepembe vachiita saizvozvo, vatambi nevatsigiri vanosvika pakugumbuka.
“Zvakashata, hatidi kugumburwa nevaridzi vepembe uye kana vazviita rinoita dambudziko.
“Pachokwadi, pamitambo 21 yatatamba, aka ndiko kange kari kekutanga kandashatirwa.”
Johanisi Nhumwa
Kuchitiwo Nhumwa apo chikwata chake chakaita mangange 1-1 neHerentals kuVhengere Stadium, kwaRusape svondo radarika akati, “Tinogara tichitaura kuti danho rine varidzi vepembe vemuno rakadzikira, ndiko kusaka tisina vepamusoro.
“Handirambe pakanzi pane huwori, asi ndinoona hangu kuti hatina varidzi vepembe vepamusoro. Pamwe inogona kunge iri nyaya yefundo iri kupihwa kuvaridzi vepembe vedu.”
