Kingstone Mapupu
VATENDI vechechi yeThe African Apostolic Church (VaApostora VeAfrica ), iyo inotungamirirwa naArchbishop Ernest Paul Mwazha, vachaita gungano reHoly Communion rematunhu eMasvingo neMidlands kubva musi wa9 kusvika 11 Nyamavhuvhu.
Gungano iri richaitirwa panzvimbo yeNdarikure mumugwagwa unobva muHarare uchienda kuMasvingo padyo nerwizi Shashe kwakadziva kugomo reChivavarira riri kwaChirumhanzu, kuMidlands.
Munyori wechechi iyi kuMidlands, Reverend Israel Mukasa, vanokoka veruzhinji kugungano iri.
“Ruzhinji rwevanhu rwunokokwa kugungano iri uko kuchange kuine kubata kwaMwari uyewo minamato yemangwanani, masikati nemanheru. Tinoti vanhu huyai nehuwandu hwenyu,” vanodaro Rev Mukasa.
Vanoti munamato mukuru uchaitwa musi wa10 Nyamavhuvhu kubva nenguva dza10:30 mangwanani kusvika na4 zuva rodoka.
“Gungano iri rakagara rakakumikidzwa neshoko rinobva mubhuku dzvene reBhaibheri mugwaro raMark 16 vs 15 kusvika 16 rinoti endai munyika yose munoparidzira hutsvene hwaMwari, kuitira kuti wose achabhabhatidzwa agoponeswa,” vanodaro Rev Mukasa.
