Conrad Mupesa
KOMISHENI inoona nezvekurwisa huwori munyika yeZimbabwe Anti-Corruption Commission (Zacc) nemusi weChitatu chino yakasunga mapurisa maviri aishandira paLion’s Den tollgate mumugwagwa Harare-Chirundu mushure mekupihwa chiokomuhomwe cheUS$1 nemumwe mutyairi wemotokari.
Paul Muchenje, anoshandira paZRP Chemagamba kuChinhoyi naShamiso Nyabasa wekuZRP Chinhoyi vari kutarisirwa kupinda mudare redzimhosva nekuda kwenyaya iyi.
Mutyairi wemotokari iyi, Blessing Mazinyama, ndiye akaudza veZacc nezvehuwori hwaiitwa nemapurisa panzvimbo iyi.
Nemusi weChitatu, Mazinyama akanyora gwaro rinotaridza kuti mapurisa aishandira patollgate iri vaiti vanoda mari kuvatyairi vanenge vashandisa tumigwagwa twekunzvenga twemikoto kuti vasabhadhare mari yetollgate.
Mari yechiokomuhomwe iyi inonzi yaitangira paUS$1 kusvika US$5 pamotokari imwe neimwe uye zvichienderana nemhando yacho.
Mapurisa aya aipomerwa kunzi aityisidzira vatyairi kuti aizotora motokari dzavo nemhosva yekunzvenga kuenda nepatollgate uye faindi yacho yainzi iUS$100.
Pavakanzwa mashoko aya, veZacc vakabva vaita ongororo yavo uye ndokukwira motokari yaMazinyama ndokumupa US$1 (serial number D101548630) ndokunanga kutollgate kuye.
Mapurisa maviri aya paakamisa Mazinyama, akaburuka ndokuvapa US$1 riye apo Muchenje anonzi akabva aisa mari iyi muhomwe yake yetirauzi.
VeZacc vakabva vadzika mumotokari iyi ndokuzvizivisa kumapurisa aya vachibva vavasunga.
