Kwayedza
Liberty Dube
AKANGE ari makuwerere kumutambo weMatendera Arts Festival uyo wakaitwa mukupera kwesvondo radarika kuBuhera apo zvikwata zvakabva kumatunhu akasiyana zvakaratidza kupfuma kuripo mutsika nemagariro echivanhu kuburikidza nemitambo yechinyakare.
Mutambo uyu wakaitwa pamwe chete nemimwe yakadai senhabvu nenetball pakati peWard 19, 21 ne23 paChiurwi Primary School apo yechivanhu yakaitirwa paDzapasi National Monuments nekuMatendera Ruins.
Donzvo rawo nderekudzidzisa veruzhinji kukosha kwezvenzvimbo yeDzapasi apo pakaungana mauto (assembly point) eZANLA pakapera hondo yekurwira rusununguko rweZimbabwe muna1979.
Chishanu, rinova zuva guru rakatanga mitambo iyi paMatendera National Monument, rakatanga nemujaho wemakiromita makumi maviri nerimwe.
Zvikwata zvakasiyana zvakaratidza mitambo yechinyakare.
Paivawo neshoo yezvimwa, michero nemishonga yechinyakare.
Matendera Monuments chivakwa chekare chakavakwa nematombo munguva ya17th century.
Nzvimbo iyi ine zvivakwa zvakashongedzwa nehunyanzvi.
Yakavakwa panzvimbo yakaderera ine nematombo anoyevedza emhando yegranite anotsvedzerera semuzinda wehumambo uye inonzi yakavakwa nevanhu vekutanga vanotaura ChiShona.
Nekune rimwe divi, Dzapasi inzvimbo yakakosha munhoroondo yehondo yerusununguko rweZimbabwe, kwete kuvagari vekuBuhera chete, asi nyika yose.
Pakupera kwehondo yerusununguko rweZimbabwe muna1979, pakatsvagwa nzvimbo dzaiungana varwi munyika yose, zvichiratidza kupera kwehondo uye shanduko yeZimbabwe itsva yakabatana.
Varwi vehondo yerusununguko vakambogara munzvimbo idzi kusvikira chirongwa ichi chapera apo vamwe vakapinda mumauto eZimbabwe Defence Forces (ZDF).
Chiurwi Primary School yakambovharwa munaChikunguru 1976 apo hondo yainge yatsviriridza.
Munguva yehondo iyi, mauto eRhodesia akagadzira nzvimbo yaimhara pamwe nekusimukira ndege paDzapasi iyo yainzi Fox Trot.
Sezvo nhandare yendege yakanga isingachashandiswe uye migwagwa yakanaka, Dzapasi yaikodzera kuve nzvimbo yakanaka yokuitira assembly point.
Nzvimbo iyi yakazonzi ichishanda senhoroondo uye tondedzo yemaassembly points ose aive munyika.
VaLloyd Makonya vekuNational Museums and Monuments of Zimbabwe vanoti: “Mutambo uyu wavandudza maonero everuzhinji pamusoro pekukosha kwechivanhu uye waita kuti vanzwe kuva vene vazvo sezvo vatora danho rekuronga mutambo uyu.
“Mitambo yakadai pasi rose ine mukana wekuvandudza nekuchengetedza tsika nemagariro. Izvi zvinobva zvabatsira mukuchengetedzwa kwenhaka uye kumutsiridza tsika dzechivanhu, semuenzaniso kuburikidza nekuvandudza tsika nemagariro evanhu.”
Muimbi wemusambo wechitendero ane mukurumbira – Blessing Shumba – uyo anobva kuBuhera, akatandadza veruzhinji zvinodakadza pagungano iri uye akagadzwa kuva mumiririri (ambassador) weMatendera Festival.
