Abel Ndooka
CHIKWATA chemaWarriors, icho chinorairidzwa naMichael Nees, chimwe chezvikwata 24 zvakabudirira kuenda kumutambo weTotal Energies 2025 Africa Cup of Nations uyo uchatambirwa kuMorocco gore rinotevera.
Aka kachange kari kechitanhatu maWarriors kubudirira kuenda kumutambo weAFCON uyo uchatanga munaZvita gore rinouya uye uchizopera munaNdira 2026.
MaWarriors akabudirira kuenda kumutambo uyu zvichitevera kupedza ari pechipiri muboka rawo muGroup J umo mange mune zvimwe zvikwata zvinoti Cameroon iyo yakapedza iri pamusoro, Kenya neNamibia.
Muboka iri, maWarriors akatamba mitambo mitanhatu ndokuhwina miviri apo akakunda Namibia kakatevedzana — wekutanga 1-0 uye wechipiri ndokuhwina zvekare 3-1.
Chikwata chenyika ichi chakazoita mangange mumitambo mitatu inoti 0-0 neKenya, 0-0 neCameroon uye 1-1 neKenya unove mutambo wakazoona maWarriors achibudirira kuenda kuAFCON.
Mutambo wekupedzisira wemuboka iri, maWarriors akazokundwa 2-1 neCameroon nemusi weMuvhuro uno kuYauonde kuCameroon.
Nees, uyo akagadzwa pachigaro chinopisa chekurairidza maWarriors munaChikunguru, abva atevera mumatsimba evamwe varairidzi vakatungamira chikwata ichi kuenda kuAFCON avo vanosanganisira Sunday Chidzambwa uyo akaenda kumutambo uyu kaviri achirairidza maWarriors, Charles Muhlauri, Kalisto Pasuwa naNorman Mapeza.
Nees paakapihwa basa iri akanzi neZifa anofanirwa kutungamira chikwata ichi kuenda kuAFCON izvo akwanisa kuita uye ozochitungamira zvekare kuti chiende kumutambo weFIFA 2026 World Cup iyo mitambo yekurwira kuendako ichadzoka munaKurume gore rinotevera.
MaWarriors ari muboka reGroup C rine zvimwe zvikwata zvinoti Rwanda, South Africa, Benin, Lesotho neNigeria uye muboka iri ndiwo akasenga ari pasi sezvo akwanisa kuita mangange mitambo miviri ndokukundwa mimwe miviri.
Nee ari kutofanirwa kushanda zvakasimba nechikwata chake kuti chigosimukira kana chichida kuenda kuWorld Cup.
