Uncategorized

Mayunivhesiti orerutsa mutoro wemafizi

21 Feb, 2020 - 00:02 0 Views
Mayunivhesiti orerutsa mutoro wemafizi Prof Murwira

Kwayedza

MAYUNIVHESITI ari pasi peHurumende anoti ane hurongwa hwekuti vadzidzi vanogona kubhadhara mari dzemafizi pashoma nepashoma kana kukwereteswa mari iyi zvakare.

Mari yefizi iyi iri kutangira pa$3 500 kusvika $5 000 patemu (semester).

Mayunivhesiti mazhinji akaita hurongwa hwekuti vadzidzi vabhadhare pashoma nepashoma mushure mekunge vamiriri mudare reParamende, vabereki naivo vadzidzi vatsutsumwa nekuwanda kwemari dziri kudiwa.

Svondo rapera, vamiriri vematunhu akasiyana muParamende vakabvunzurudza gurukota redzidzo yepamusoro, sainzi nekuvandudzwa kweruzivo rwemichina, Professor Amon Murwira, pamusoro pemari dziri kubhadhariswa nemayunivhesiti ari pasi peHurumende.

Vamiririri vematunhu ava vanoti mari iyi yakawanda zvekuti ichaita kuti vamwe vadzidzi vatadze kuenda kuchikoro sezvo vabereki vazhinji vasingaikwanise.

Mayunivhesiti mazhinji ari kutendera vadzidzi kuti vabhadhare chikamu che60 percent chemari yechikoro, 40 percent inenge yasara ichizobhadharwa mavhiki maviri vasati vatanga kunyora mazamanishoni.

Vakuru vepaUniversity of Zimbabwe (UZ) vanoti svondo rino vanga vachigadzirisa mafomu ekuti vadzidzi vatore zvikwereti zvekubhadhara fizi.

Zvikwereti izvi zvinoshandiswa kubhadhara mari yose yechikoro iyo inodzorerwa nenzira dzakareruka.

Communications director paUZ, VaDaniel Chihombori, vanoti, “Tine dzimwe nzira dzakareruka dzekuti vadzidzi vabhadhare mari dzechikoro apo mudzidzi paanowana nzvimbo anobva avhurirwa akaundi yake. Mudzidzi anobhadhara kuakaundi iyoyo chero nguva uye paadira.

“Pachinzvimbo chekuti vamirire mazuva ekupedzisira, mubereki kana mudzidzi anokwanisa kuisa chero mari yaanenge awana muakaundi iyoyo. Vaya vanokwanisa vanogona kungobhadhara mari yechikoro uye yegore rose kana yekusvika paanenge apedza chikoro.”

VaChihombori vanoti chirongwa chekukweretesa vadzidzi chakavambwa neHurumende yakabatana nemamwe mabhengi nemakambani ari mune zvemari.

“Chirongwa ichi chinoitwa nemayunivhesiti ose ari pasi peHurumende uye yakaisa homwe ye$50 miriyoni padivi yakamirira izvi,” vanodaro.

Mari inozowedzerwa pakudzorera zvikwereti izvi ishoma zvekuti vadzidzi vari kukurudzirwa kushandisa mukana uyu.

PaLupane University, Bulawayo campus registrar vepo, VaJairos Makunde, vakapa chiziviso chekuti, “Vadzidzi vari kukurudzirwa kuti vabhadhare chikamu che60 percent chemari yavo yechikoro uye kuti vakasvika musi wa17 Kukadzi 2020 kutadza kubhadhara kuchaita kuti vasatenderwa kupinda muzvidzidzo zvavo.”

Yunivhesiti iyi inoti iri kuda $5 100 pazvidzidzo zveSocial Science neCommerce.

National University of Science and Technology (NUST) iri kudawo $5 788 pazvidzidzo zveCommerce, $7 500 paMedicine uye $5 050 yeEgineering.

Linda Ncube (22), uyo ari mugore rechipiri paNUST, anorumbidza zvakaitwa neyunivhesiti iyi pakupa mukana wekuti vabhadhare mari muzvidimbu.

Anoti chirongwa ichi chakakosha sezvo vabereki vari kunetseka kuwana mari.

Anoona nezvekudyidzana neruzhinji kuNUST, Mai Lindiwe Nyoni, vanokurudzira vadzidzi kuti vaende kumahofisi anobhadharirwa mari yechikoro vaite hurongwa hwekubhadhara mari dzavo.

Director public relations paBindura University of Science Education, VaJames Gutura, vanoti yunivhesiti yavo yagara iine chirongwa chekuti vadzidzi vanobhadhara muzvidimbu.

Mukuru weMutare Polytechnic, Muzvare Poniso Watema, vanotiwo havana hurongwa hwekubhadharisa fizi muzvidimbu pakoreji pavo.

“Avo vanenge vatadza kubhadhara mari havakwanise kuwana zvinenge zvabuda mubvunzo pavanopedza,” vanodaro. — The Herald

Share This:

Sponsored Links

We value your opinion! Take a moment to complete our survey