Kwayedza
Kingstone Mapupu
MAPURISA ekuBeatrice kuMashonaland East vasunga vanhu vapfumbamwe nemhosva dzekuba mombe dzinokwana 66 dzichikosha US$26 400.
Mutauriri wemapurisa kudunhu reMashonaland East, Inspector Simon Chazovachii vanoti mukati memombe dzakabiwa idzi, 37 dzakawanikwa dziri mhenyu kunzvimbo dzakasiyana kwadzaiva dzatengeswa nekuvigwa.
“Tine varimi vashanu vekumapurazi ekuBeatrice nekumwewo vakabirwa mombe dzavo dzinokwana 66 nemakororo mapfumbamwe ayo ainodzitengesa kunzvimbo dzakasiyana nekudzichengetesa. Vakabirwa ava ndiVaClever Chikanda (28) vepaPlot 30 kuGreenlands kuBeatrice, VaChristopher Zvobgo (70) vepaPlot 28 papurazi reAlisdale West kuBeatrice, VaMoffat Mwani (56) vepapurazi reAlisdale kuZengeya kuBeatrice, VaArtwell Forichi (44) vePlot 8 kupurazi reDoran’anga kuBeatrice naVaJames Manduki (44) vekupurazi reSamaita kuBeatrice,” vanodaro Insp Chazovachii.
Vakasungwa nekuda kwemhosva dzavari kupomerwa dzekuba mombe ndiBlessing Mutambi Mahora (18) wepaAlisdale, Tichaona Matemba (17) wepaMunandi, Prosper Mutini (25) wepaPlot 38 papurazi reOrangia naPatrick Chirata (44) wekwaSabhuku Maredza kwaMambo Gora kwaMashayamombe, kuMhondoro.
Vamwe ndiMathias Nziramasanga (67) wepaPlot 8 papurazi reGeorgia kuBeatrice, Charles Matemba (55) wepapurazi rePama kuNyabira, Kundai Chirata (18) wemumusha waMaredza kwaGora kuMhondoro, Joseph Moyo (59) naEnock Tafireyi (38) wekwaNyatsambo kwaBenhura kuMhondoro zvekare.
“Nemusi wa8 Kubvumbi, VaJames Manduki vepapurazi reSamaita kuBeatrice vakamhan’ara kumapurisa nyaya yekubiwa kwemombe 19 idzo vanoti dzakaonekwa dzichitinhwa nevanhu vaisazivikanwa dzichienda kusina akaziva. Mukuferefetwa kwenyaya iyi, zvakazozivikanwa kuti mombe idzi dzainge dzaendeswa kwaKadhani, kuMhondoro dzikadarika nepapurazi reMutubuki.
“Mombe idzi dzinonzi dzaiva 11 uye dzichitinwa naTichaona Matemba naProsper Mutini dzichiendeswa kupurazi reOrangia,” vanodaro Insp Chazovachii.
Vanoti Mahora paakasungwa, akazodoma vamwe vake munyaya dzekuba mombe vanosanganisira Tichaona Matemba, Mutini naPatrick Chirata kuti vainge vaba dzimwe mombe dzacho vakanodzitengesa panzvimbo yemabhizimisi yepaKadhani, nyama yacho ndokuitakura kuendesa kupurazi rekwaZhanda.
“Mukuferefetwa kwenyaya iyi, zvakabuda pachena kuti chikwata chembavha ichi mugore ra2021vakawirirana kuba mombe vakadzichengeta kunzvimbo yemabhizimisi yekwaKadhani uko vaidzitengesa kuvanhu vakasiyana.
“Munhu akawanikwa aine mombe dzakawanda dzinonzi ndedzekuba dzaikwana 23 ndiMathias Nziramasanga uyo akazodurawo vamwe vake,” vanodaro Insp Chazovachii.
Mombe dzakawanikwa 37 dzinokosha US$14 800.
“Tinokumbira vamwe vanhu vakashaya mombe dzavo kuti vaende kumapurisa ekuBeatrice kunotarisa mombe dzavo ikoko uyewo tinokurudzira kuti varimi vaise michiso pamombe dzavo. Tinokurudzirawo veruzhinji kuti vazivise mapurisa kana vaona vanhu vavanofungira kuti imbavha, dzingava emombe nezvimwe zvinhu kana kuvatora vovaendesa kumapurisa.
“Tinonyanya kutenda mapurisa edu nebasa guru ravakaita zvinoratidza kuzvipira kwavo mubasa uyewo tinokurudzira vemabhucha kuti vasatenga mombe dzekuba sezvo vachigumawo vasungwa voendeswa kujeri,” vanodaro Insp Chazovachii.
