Kingstone Mapupu
MURUME anofungidzirwa kuti aida kuba mune imwe imba — iyo akapinda nepahwindo kuMtapa Section 5, kuGweru munguva dzemanheru — anonzi akakotsira kusvikira kunze kwayedza apo akazomutswa nevaridzi vemba achidzipfodora hope zvakaita kuti asungwe nemapurisa.
Izvi zvakaitika svondo rapera apo Jealous Munsaka (28) anobva mumusha waSabhuku Kalonga kudunhu raMambo Siabuwa, kuBinga akasungwa mushure mekuwanikwa ari mumba meimwe mhuri umo akange apinda nechisimba.
Mutauriri wemapurisa kudunhu reMidlands, Inspector Emmanuel Mahoko, vanoti murume uyu akakwira nepamusoro pewaya yakakomberedza pamba apa ndokunovhura hwindo reimba yekubikira achibva apinda mukati umo akabva angokotsira ari woga imomo.
“Hazvizivikanwe kuti Munsaka akazobatwa nehope sei uyewo aiva mundima yake yekuedza kuba mumba umu. Kunze kwakasvika pakuedza murume uyu achingova mumba umu, varidzi vepamba ndokumuka vakamuwana achakarara nenguva dza0600 hours. Varidzi vemba ava ndivo vakatomumutsa ndokutanga kumubvunzurudza avo vakaona kuti hapana chaakanga aba uyewo zvakaonekwa kuti pfungwa dzake dzaiva dzakadzikama,” vanodaro Insp Mahoko.
Munsaka anonzi akabva amhan’arirwa kumapurisa achibva asungwa.
Musungwa uyu akatomira mudare kekutanga nemhosva yekupinda mumba mavaridzi nechinangwa chekuda kuba uye nyaya yake iri kuenderera mberi nekuferefetwa.
“Inyaya inonetsa kunzwisisa yemurume uyu kuti akapinda sei mumba umu uyewo tinokurudzira ruzhinji kusatora mutemo vachiisa muhomwe dzavo. Murume uyu ari kupomerwa mhosva huru kumatare yekupwanya imba nekuedza kuba,” vanodaro Insp Mahoko.
