Kwayedza
Muchaneta Chimuka
KAMBANI inogadzira fetiraiza yeZimbabwe Fertilizer Company (ZFC) yakaparura muchina mutsva unogadzira fetiraiza iyi (New Fertilizer Blending Plant Machine) uyo unokosha US$500 000 kuAspindale, muHarare.
Danho iri richaona fetiraiza ichigadzirwa nehuwandu hwayo pamwe nekuwanisa veruzhinji mabasa.
Vachitaura pazuva rekuparurwa kwemuchina uyu, gurukota rezvemaindasitiri nekutengeserana VaMangaliso Ndlovu vanoti chirongwa ichi chauya panguva yakanaka zvikuru apo varimi vari kugadzirira mwaka wekurima.
“Kurima kwakakosha zvikuru sezvo kuchisimudzira upfumi hwenyika pamwe nekuwanisa veruzhinji zvekushandisa nechikamu che63 percent. Vanhu vazhinji vari kumaruwa vari kuwaniswa mabasa kuburikidza nekurima uye chikafu chakakwana chine utano chinobva muminda. Hatikwanisi kubudirira mukurima kana tisina zvekushandisa kusanganisira fetiraiza,” vanodaro.
Vanoti Zimbabwe, sedzimwe nyika, iri kutambudzwa nenyaya dzekusanduka kwemamiriro ekunze akadai semafashamu ane dutu akabva mukuitika gore rino eCyclone Idai zvinova zviratidzo zvinoda kuti pave nekushandiswa kweruzivo rutsva mukurima.
“Zimbabwe inofanira kushandisa nzira dzekurima dzakanaka seruzivo rwechizvino-zvino rwakadai sekushandiswa kwemadrone, GPS system uye fetiraiza kuti nyika isaite nzara apo inowirwa netsekwende dzekusanduka kwemamiriro ekunze. Munguva pfupi yadarika, bazi redu rakaparura chirongwa cheZimbabwe National Industrial Development Policy (ZNIDP 2019-2023) icho chinofambirana necheTransitional Stabilization Policy (TSP) nechinagwa chekusimudzira mabhizimusi anosanganisira ekurima, kuunza ruzivo rutsva mukurima uye kutengeswa kwezvirimwa kune dzimwe nyika zvichiita kuti nyika iwane mari yekunze,” vanodaro VaNdlovu.
Vanoti vanofara zvikuru kuti kambani yeZFC iri kuzadzikisa zvimwe zvezvinangwa zvavo kuburikidza nekusimudzira nyaya dzemichina inogadzira fetiraiza kuti inge ichigadzirwa nehuwandu hwayo.
