Abel Ndooka
MAPURISA eZimbabwe Republic Police kuChinhoyi ari kutsvaga Tafadzwa Nkonde (33) nemhosva yekubata chibharo mumwe mudzimai, pashure ndokumumanikidza kunwa muchetura izvo zvakakonzera kufa kwake kuMakonde, kudunhu reMashonaland West.
Vachinyora papeji ravo reX, ZRP inoti nemusi wa31 Nyamavhuvhu, Nkonde akabata mudzimai uyu chibharo mumusha waMuvhami, kuMakonde, ndokuzomumanikidza kunwa mushonga wefodya.
Mudzimai uyu akazofira kuchipatara cheChinhoyi Provincial Hospital uko airapwa.
“Mapurisa ekuChinhoyi ari kutsvaga umbowo hunobatsira mukusungwa kwaTafadzwa Nkonde (33) uyo ari kutsvagwa nemhosva yaakapara mumusha waMuvhami kuMakonde musi wa31 Nyamavhuvhu 2024.
“Murume uyu ari kupomerwa kubata chibharo mudzimai ane makore 37 okuberekwa, ndokuzomumanikidza kunwa mushonga wefodya uyo waive uri mubhegi rake. Mudzimai uyu akazofira kuchipatara cheChinhoyi Provincial Hospital musi wa2 Gunyana.
“Kana paine ane umbowo ngaazivise mapurisa ari pedyo,” inodaro ZRP.
