Kwayedza
Munyori weKwayedza
MUKADZI wekuGweru akasungwa nemhosva yekuponda murume wake munyaya ine chekuita nemhirizhonga yemudzimba.
Murume wemukadzi uyu anonzi akadonhera pasitendi yeterevhizheni yakagadzirwa nemagirazi pavairwisana zvikaita kuti achekwe maronda akadzika ndokubuda ropa zvakanyanya uye akazofa apo aive agere mumotokari yake.
Mutauriri wemapurisa kudunhu reMidlands, Inspector Emmanuel Mahoko, vanotsinhira nyaya yekusungwa kwaSophia Nherera (makore ake haana kuziviswa) zvichitevera kufa kwemurume wake, Joseph Hama (36).
Vaviri ava vaigara kuBrooklyn Farm Compound kunze kweGweru.
“Mapurisa eZimbabwe Republic Police (ZRP) ari kuferefeta nyaya yehumhondi apo murume aive nemakore 36 okuberekwa akafa mushure mekuita maronda akadzika pabendekete zvichitevera kusanzwisisana kwaakaita nemudzimai wake. Nyaya iyi yakaitika nemusi wa7 Nyamavhuvhu, kuma10 manheru paBrooklyn Farm Compound, Gweru,” vanodaro Insp Mahoko.
Vanoti nenguva dza7:30 manheru, Hama akasvika kumba achiratidza kuti aive akadhakwa pachibva paita kusanzwanana nemudzimai wake.
“Muzuva rimwe chetero kuma7:30pm, mushakabvu, Joseph Hama, akasvika kumba akadhakwa uye akatadza kunzwisisana nemudzimai wake. Anonzi akatanga kumurova muviri wose achimutyisidzira achiti anoda kumuuraya,” vanodaro Insp Mahoko.
“Hama anonzi akazowira pasitendi yeterevhizheni akachekwa pabendekete rekurudyi. Mudzimai uyu, Sophia Nherera akatiza ndokunopotera kumba kwemuvakidzani,” vanodaro Insp Mahoko.
Zvinonzi Hama akatevera mudzimai wake apo akazorandutsirwa nemuvakidzani wavo, VaWisdom Nyambira.
Insp Mahoko vanoti Hama anonzi akazodzokera kumba kwavo ndokusvikopinda mumotokari yake yemhando yeHonda Fit.
“Muvakidzani uyu akazowana Hama akafa akagara mumotokari yake kuma10 dzehisiku zvikaita kuti nyaya iyi inomhan’arwa kupamurisa vanovawo vakasvika panzvimbo iyi ndokutanga kuferefeta,” vanodaro.
Insp Mahoko vanoti mutumbi waHama wakaendeswa kumochari yeGweru Provincial Hospital kunoongororwa nanachiremba.
“Mudzimai uyu akasungwa achipomerwa mhosva yekuponda uye kuferefetwa kwenyaya iyi kuri kuenderera mberi. Tinoramba tichiyambira veruzhinji kuti vanofanira kugadzirisa kusawirirana kwavo mudzimba murunyararo kana kutaurirana nevamwe vanokwanisa kuvayananisa kwete kuita zvemhirizhonga,” vanodaro.
