Kingstone Mapupu
MUIMBI wechitendero — Gogo Dorcas Muranda (77) — vakabura kambo kanoshora kutorwa kwezvinodhaka, kunyanya nevechidiki, ako kanoburitsa pachena matambudziko ari kukonzwerwa nekatsika aka.
Kambo aka kanonzi Vanunurei ako kane vhidhiyo uye kanotaura nekubatsirwa kungaitwa vechidiki pamwechete nevakuru vanotora zvinodhaka rinova dambudziko guru ratarisana nenyika.
“Mukaona zera rangu nemakore angu, ndakurira muno muMbare ndikaona magariro aiita vanhu kare nazvino. Tine vechidiki vaiva neupenyu hwakanaka muno asi vaparara nekuda kwezvinodhaka zvakaita semutoriro nezvimwe. Saka ndakaona zvakakodzera kuti ndiburitse kambo kanotaura nekutorwa kwezvinodhaka,” vanodaro Gogo Muranda.
Vanoenderera mberi vachiti: “Kutorwa kwezvinodhaka ingozi yapinda munyika sezvo tinoona kuti vamwe vechidiki vangofanana nekuti vakafa nekuda kwekutiu hapana chimwe chavanokwanisa kuita kana kuroora nekuroorwa hapachina. Pamisha chaipo havana mabasa avanoita, kune varume vakuru nemadzimai vakuru vaparadzawo mhuri dzavo nekutora zvinodhaka, mukaona kupondana kwanyanya nekuda kwezvinodhaka.”
Gogo Muranda vanoti mukambo kavo vanokurudzira mapoka ose anokwanisa kuita zvakasiyana kuti vabatsirane kupedza dambudziko rekushandiswa kwezvinodhaka.
“Mukambo kangu ndinotaura nekushungurudzwa kuri kuitwa vabereki nevana vanotora zvinodhaka, vamwe vachitosvika pakupondwa. Vabereki tava kubatwa nezvirwere zvatanga tisina zvakaita seBP, shuga nekushungurudzika mupfungwa nekuda kwekushungurudzwa nevana vari kutora zvinodhaka,” vanodaro Gogo Muranda.
“Vechidiki vasungwa mbira dzakondo nekuda kwezvinodhaka nevamwewo vechikuru vapinda mazviri.
“Kumhuri kwangu chaiko nemunharaunda mandinogara dambudziko iri rakura saka tinoti ngatirinamatirei.”
Gogo Muranda vanokurudzira kuti vechidiki vatsigirwe mukutanga mabhindauko akasiyana-siyana anovapa chouviri senzira yekuti vawane zvekuita izvo zvinovabvisa mukutora zvinodhaka.
