Abel Ndooka
MUTAMBI wemaWarriors – Marshall Munetsi – akatamba mutambo wekutanga musi weSvondo wadarika kuchikwata chake chitsva cheWolverhampton Wanderers apo chakakunda Blackburn Rovers 2-0 mumutambo weEnglish FA Cup.
Mutambo uyu watambirwa kunhandare yeEwood Park musha weBlackburn Rovers uye Munetsi akatanga akagara pabhenji asi ndokuzopinzwa mutambo watambwa maminitsi 66 achitsiva Goncalo Guedes muchikamu chechipiri apo Wolves yainge yakatotungamira 2-0.
Uyu ndiwo waive mutambo wekutanga waMunetsi kubva zvaakatengwa neWolves svondo radarika pazuva rekupedzisira rekutengesa vatambi muhwindo raNdira izvo zvakamuona achibva kuStade de Reims kuFrance kuLigue uko ange ave nemakore akawanda achitambira nhabvu yake.
Achitaura mushure memutambo uyu, Munetsi anoti: “Ndiri kunzwa kufara kutamba mutambo wangu wekutanga ndichitambira chikwata chino chikuru Wolverhampton Wanderers FC.
“Ndinotenda nerutsigiro rwese uye tinoramba tichifambira mberi sechikwata chimwechete #One Pack.”
Mune mimwe mitambo yeFA Cup yakatambwa kuEngland, Trey Nyoni naIsaac Mabaya – avo vanotambira Liverpool – chikwata chavo chakakundwa 1-0 nechaBrendan Galloway chePlymouth Argyle kunhandare yeHome Park kuPlymouth.
Nyoni akatanga mutambo uyu ndokutamba maminitsi 76 uye ndokuzotsiviwa naTrent Toure Kone-Doherty, kuchiti Mabaya akatanga mutambo uyu akagara pabhenji asi akazopinda watambwa maminitsi 11 achitsiva Joe Gomez uyo ainge akuvara.
Mabaya akazoburitswa muchikamu chechipiri chemutambo uyu apo wainge watambwa maminitsi 58 achitsiwa naDarwin Nunez.
Plymouth iri kufambira mberi mumutambo uyu uye draw rechikamu chinotevera rachaitwa svondo rino.
