Kwayedza
Abel Ndooka
MUTAMBI wemaWarriors neStade de Reims yekuFrance, Marshall Munetsi, akanwisa apo chikwata chake chakunda cheTroyes 4 – 0.
Munetsi ndiye akatanga kunwisa mumutambo uyu apo akagohwesa mutambo watambwa maminitsi 10 uye vamwe vatambi veReims vanoti Myziane Maolida, Folarin Balogun naJens-Lys Michel Cajuste vakanwisawo. Kuhwina kweReims kwaiona ichienda pachinzvimbo chechipfumbabwe muLigue 1 patambwa mitambo 23 uye ine mapoinzi 33.
Mwaka uno Munetsi akwanisa kunwisa katatu mumitambo 20 yaatamba yeReims. KuEngland, Marvelous Nakamba akatamba mutambo wose apo chikwata chake cheLuton Town chakaita mangange 1-1 neCoventry kuchiti Jordan Zemura akatambawo mutambo wose apo AFC Bournemouth yakaita mangange 1-1 neNewcastle musi weMugovera.
