Kingstone Mapupu
MURUME ane makore 45 okuberekwa wekwaNyika kuBikita, kuMasvingo akasungwa mushure mekuwanikwa achitengesa mbanje iyo yaive muchitsapo chinorema 2kgs panzvimbo yemabhizimisi yeko.
Mutauriri wemapurisa kudunhu reMasvingo, Inspector Kudakwashe Dhewa, vanoti chikwata chematikitivha eCriminal Investigations Department (CID) Drugs and Narcotics chakasunga Shadreck Sithole paNyika Growth Point nemusi wa30 Zvita.
“Mushure mekunge mapurisa aya eCID vawana runyerekupe rwekuti murume uyu aitengesa mbanje kuruzhinji munzvimbo yemabhizimisi yeNyika Growth Point kuBikita, vakazomutsvaga ndokumusunga aine chitsapo chembanje yairema 2 kgs,” vanodaro Insp Dhewa.
Vanoti apo veruzhinji vaigadzirira kupemberera zororo regoredzva, Sithole aiva mubishi kutengesa mbanje iyi, kunyanya kune vechidiki.
Musungwa uyu akachengetedzwa muchizarira achimirira kuendeswa kudare redzimhosva nekuda kwemhosva yekutengesa mbanje.
“Semapurisa, tinoyambira veruzhinji kuti imhosva kurima mbanje usina magwaro anotenderwa uyewo nekuitengesa kwacho. Pane mashoko emanyepo ari kufambiswa neveruzhinji ekuti mbanje yava kubvumidzwa, munosungwa sezvakaitwa uyu mukawanikwa muinayo. Kune matanho anotevedzwa kuti munhu abvumidzwe kurima mbanje zviri pamutemo,” vanodaro Insp Dhewa.
