Kingstone Mapupu
MURUME ane makore 54 okuberekwa wekwaKutama, kwaZvimba anonzi akaponda aimbove mudzimai wake uyo aiva nepamuviri nekuda kwekuti aida mari yekuenda kuchipatara kunoongororwa nanachiremba kuti aitwe scan.
Mutauriri wemapurisa kudunhu reMashonaland West, Inspector Ian Kohwera, vanoti Bernard Kufakunesu anonzi akaponda Viola Chitsinde (27) uyo aive arambana naye uye vasisagare vose.
“Tine nyaya inosuwisa zvikuru yemurume anonzi Bernard Kufakunesu (54) uyo akaronga kunosangana naViola Chitsinde kunzvimbo yemabhizimisi yekwaMasiyarwa kwaKutama apo mudzimai uyu aida mari yekuenda kuscan sezvo aiva nepamuviri.
“Nenguva dza2200 hours, vaviri ava vakatanga kunetsana ndokuzorwisana. Kufakunesu akazotora tambo yemagetsi ndokudzipa Viola Chitsinde nayo achibva angofa,” vanodaro Insp Kohwera. Vanoti zvose izvi zvakaitika mumaziso memwana wavo wemakore mana okuberekwa.
“Kufakunesu akazovhara mutumbi uyu negumbeze achibva auisa mubhara ndokuusundudzira kuenda nawo kwaSabhuku Mahere kwakare kwaZvimba uko akanourasa musango. Mutumbi uyu wakazoonekwa nevagari vemunzvimbo iyi vaitsvaga huni vakabva vazoenda kunomhan’ara nyaya iyi pakamba yekwaKutama ZRP. Wakazotakurwa kuendeswa kumochari yechipatara cheChinhoyi Provincial Hospital kunoongororwa nanachiremba,” vanodaro Insp Kohwera. Mukufeewa kwenyaya iyi, Kufakunesu akazosungwa.
“Semapurisa, tinoramba tichikurudzira vanhu kuti varemekedze upenyu hwevamwe uyewo kuti kana vakatadza kuwirirana vanofanirwa kutsvaga nzira dzakanaka dzekugadzirisana pane kurwisana nekukuvadzana kusvika pakupondana. Kune vanhu vari muwanano kana paine zvinonetsa, vanofanirwa kutsvaga vayananisi pane kuti vagadzirise nyaya dzavo voga,” vanodaro Insp Kohwera.
Vanoti kune nzira zhinji dzekuti vanhu vayananiswe dzinosanganisira kuenda kumapurisa, madzishe nemasabhuku uyewo nekumafundisi emunharaunda.
