. . . votogare vose semurume nemudzimai
MUDZIMAI wekuZambia anonzi Betty Mbereko (40), akaroorwa nemwanakomana wake, Farai Mbereko (23), mushure mekupihwa pamuviri izvo zvasiya vagari vemunharaunda yavo vasina neremuromo.
Betty, uyo akafirwa nemurume makore gumi nemaviri apfuura, akarera Farai ari oga uye anotsinhira kuti rudo rwake nemwanakomana wake rwakatanga makore matatu apfuura, izvo zvakazoita kuti abate pamuviri.
Paitongwa nyaya iyi mudare rasadunhu venzvimbo yavanogara, VaNathan Muputirwa, Betty anoti akatambura zvakanyanya achirera Farai apo akashandisa mari yakawanda mudzidzo yake nekudaro zvinokodzera kuti aroorane nemwanakomana wake wekubereka semuripo wekuzvipira kumuchengeta kwaakaita.
Anoti rudo rwake kuna Farai uye mari yaakashandisa mukumurera zvinoita kuti wanano yavo iendeke uye akaramba pfungwa yekuroorwa nevanin’ina vemurume wake, avo vaanopomera kuti vaimuchiva.
Farai, uyo ari kutsigira zvakasimba kudanana kwaari kuita naamai vake, anoti akazvipira kubhadhara mari yejeredzwa yeroora yakasiiwa nababa vake.
Anoti zvakakosha kuti abude pachena kudanana kwaari kuita naamai vake kuitira kudzivirira Betty asapomerwe kuti ari kuita zvechipfambi nekuda kwepamuviri paanapo.
Zvisinei, Sadunhu Muputirwa vakapikisa zvakanyanya wanano yevaviri ava vachiti izvi zvinoshoreka, hazvina hunhu zvachose uye chipini chinokonzera munyama mudunhu ravo.
Vakayambira Betty nemwanakomana wake kuti kuita chipini chemhando iyi kunoita kuti pazove nemurango wakasimba sezvo zvisingatarisirwe patsika nemagariro echivanhu.
Sezvo vanoziva kuti chipini chakadai chinokonzera kuti vapedzisire vasungwa nemapurisa, amai ava nemwanakomana wavo vakasarudza kutama zvavo mudunhu iri pane kuti varambane.
Zvisinei, kubva kwavo mudunhu iri kwasiya mibvunzo yakawanda isina mhinduro maererano nemutemo, tsika nemagariro echivanhu pamwe nehunhu hwavo.
Pamusoro pezvo, ramangwana raBetty nemwanakomana wake panyaya yewanano yavo harina kujeka. — News Chart Media
