Muchaneta Chimuka
MURUME wekuGoromonzi wekubatwa nemhosva yekuba nharembozha nhatu nemimwe midziyo uye kuwanikwa aine pfuti akatongerwa kugara mujeri kwemwedzi 36 izere nedare reChitungwiza Magistrates Court.
Musungwa uyu akatongwa pasi pemutemo weUnlawful Entry in Aggravated Circumstances as Defined in Section 131 (1) (d) of the Criminal Codification and Reform Act Chapter 9:20.
Mutongi wedare iri, VaAlois Midzi, vakatemera Tinotenda Reza chirango chekugara mujeri kwemwedzi 36 izere pamhosva nhatu dzekuba nharembozha.
Pamhosva yekutanga, Reza akapihwa chirango chekugara mujeri kwemwedzi 36 akazobvisirwa mina nechitsidzo chekuti haafaniri kupara imwe mhosva yerudzi urwu makore mashanu asati adarika.
Pane yechipiri, akapihwa chirango chekugara mujeri kwemwedzi 15 akazobvisirwa mimwe nechitsidzo chekuti haafaniri kupara mhosva yakadai mukati memakore mashanu.
Pamhosva yechitatu, Reza akapihwa chirango chekugara mujeri kwemwedzi misere inova yakasendekwa yese parutivi nechitsidzo chekuti anofanira kuripira mumhan’ari US$1 235.
Muchuchisi Tendai Ruwocha vakaudza dare kuti nomusi wa4 Kubvumbi gore rapera, Tanyaradzwa Mutangadura (22) wemubhuku raChinhanga kwaSeke akaenda kunorara munguva dzemanheru achibva akiya misuwo yake.
Reza, uyo anogara kuSoutherton Roses Farm kuGoromonzi, akabva aenda pamba apa ndokushandisa mudziyo usina kuzivikanwa mukupaza musuwo ndokupinda.
Akaba nharembozha nhatu dzinoti, Iphone 8, Iphone X neMax Phone uye ndokubawo US$450, monarch nemarita masere emafuta achibva atiza panzvimbo iyi pasina akamuona.
Nomusi wa4 Chivabvu, Reza akasungwa nemapurisa ari kuEpworth uko akawanikwa aine kabhegi kaive nenharembozha dzakawanda.
MaIphone aainge aba akakwanisa kurondwa sezvo aive akaiswa patireka (tracking system) nemumhan’ari.
Zvinhu izvi zvakawanikwa kumba kwaDoreen Munikwa, kusanganisira bhegi raive nepfuti.
Reza ndiye akaperekedza mapurisa kumba kwaive nemidziyo iyi.
Midziyo yakabiwa, kusanganisira bhegi nepfuti, yaikosha US$1 050.
