Kwayedza
Muchaneta Chimuka
MUSHANDI wepaHerentals Groups of Colleges, kuChitungwiza, akashamisa vanhu vaive mudare apo akabvuma mhosva yake yekuba maredhiyo matatu mubhazi, murori nemukombi zvepakoreji iyi achiti aida kuatengesa kuti awedzere mari yekuti atenge tikiti rendege rekuende kunyika yeChina.
Mutongi wedare reChitungwiza Magistrate’s Courts, Tendai Mutamba, akapa Dennis Kagongo (27) wekuSection 03 Kambuzuma, muHarare, chirango chekugara mujeri kwemwedzi misere.
Akazomubvisira mwedzi miviri pachirango ichi paine chitsidzo chekuti haafaniri kupara imwe mhosva yerudzi urwu mukati memakore mashanu.
Mutongi Mutamba akaenderera mberi nekumubvisira mwedzi mitanhatu yainge yasara nechitsidzo chekuti anofanira kunofondoka pasina muripo kwemaawa 210 paKambuzuma Primary School, muHarare.
Muchuchisi Farai Katonha akaudza dare kuti nomusi wa10 Chikunguru munguva dzemangwanani, Kagongo akasechwa mubhegi make nemurindi wepakoreji apa anonzi Clairedge Karombo achibva awanikwa aine midziyo yekuba.
Akabva aendeswa kune mukuru wekoreji iyi, VaAdmire Mapaire (32), achibva abvuma kuti ainge aba maredhiyo aya mubhazi, mukombi nemurori zvepo.
VaMapire vakabva vanomhan’ara kumapurisa.
Midziyo iyi inokosha $350 uye yose yakawanikwa iri mubhegi raKagongo.
Kagongo anobvuma mhosva yake achiti, “Mhosva yekuba redhiyo nhatu neantenna sytem ndinoibvuma.
‘‘Ndakazviba mumabhazi echikoro, murori nemukombi ndichida kuti ndiwane mari yekuwedzera mari yekuenda kuChina.”
