Kwayedza
Ashley Muchamiri
MURUME wekuoneswa pfumvu nemuvakidzani wake uyo waanoti anoenda kupurazi kwake nevana vake pose pavanenge vabva ku“Joni” vachinomurwisa akazopotera kudare.
Lorrance Murambiwa akadhonzera Caivin Mutasa kuHarare Civil Court achiti ari kumushaisa rugare nevana vake.
“Pese panouya vana vake vari Joni, Mutasa anouya nevana vake kumunda kwangu vachindikutsirana kundirova uyezve vana vake vanonditi unombozviita saani wakamborovesa baba vedu?” anodaro.
Murambiwa anoudza mutongi Noah Gwatidzo kuti Mutasa nevana vake vatatu vanomutyisidzira vachiti vanoda kumuuraya.
Mutasa anoramba zviri kutaurwa achiti nyaya yavanonetserana ndeyekuti Murambiwa akapfurikidza muganhu wake wemunda.
“Ini handimbomutyisidzire asi kuti nyaya yemuganhu wemunda iri kunetsa pakati pangu naye,” anodaro.
Anoti haatozive kusvika pamba paMurambiwa asi kutoti iye ndiye anoenda pamunda pake nekuchigayo kumba kwake. Mutongi Gwatidzo akapa Murambiwa gwaro redziviriro.
