Kwayedza
Muhamed Komboni
MURUME anogara kuDangamvura, kwaMutare, akamiswa mudare reko achipomerwa mhosva yekushungurudza amai vake achiti anoda kuvagura musoro agoushandisa nemishonga kuti bhizimisi rake ribudirire.
Last Nyama (30) anobvuma mhosva yake paanomiswa pamberi pemutongi Purity Gumbo wedare reMutare Magistrate Court.
Muchuchisi Brian Goto anoudza dare iri kuti nemusi wa22 Mbudzi gore rapera, Nyama akayambirwa nedare reMutare Civil Court kuti asiyane netsika yekutuka, kurova uyezve kushungurudza amai vake Rosemary Musariri (75) avo vakanga vapotera kudare vachida gwaro rerunyararo.
Nyama akabvumirana nezvaaiva ataurirwa nedare iri asi akazotyora mutemo uyu ndokuenderera mberi nekushungurudza amai vake.
“Zvinonzi nemusi wa28 Mbudzi, Nyama akatanga kushungurudza amai vake apo akavaudza magaramwoyo nekuvatyisidzira achiti ari kuda kuvacheka musoro wavo agoushandisa kuita mabhizimisi kuti azove shoroma. Izvi zvinoratidza kuti Nyama akatadza kuchengetedza gwaro rerunyararo raakapihwa mudare pakutanga,” anodaro muchuchisi Goto.
Anoenderera mberi achiti, “Nyama anonzi akaudza amai vake kuti, ‘Iwe ndava kutoda kukugura musoro ndiite bhizimisi, ndiite mari uyezve hauna chitupa chinoti Nyama saka hausi wepano, ndiwe unofanira kubva pano. Wakabara vamwe vose asi ini handisi mwana wako.’”
Mutongi Gumbo anoyambira Nyama kuti asiyane netsika yekushungurudza amai vake uye kuti avaremekedze semubereki wake.
Nyaya iyi ichiri kuenderera mberi nekutongwa mudare iri.
