Abel Ndooka
ZVIKORO zvina zvekumaruwa zvichabandana pamutambo wenhabvu weCoach Stanley Give Back to Community Under 14 Tournament uyo uri kurongwa nechinangwa chekusimudzira nhabvu yekumaruwa.
Mutambo uyu uri kurongwa nemurairidzi wenhabvu wechidiki – Stanley Kavayi – uyo anotungamira chikwata cheReal Stars chekuMbare. Kavayi akavamba chirongwa chekufamba kumaruwa achironga mitambo yenhabvu muzvikoro nechinangwa chekusimudzira vechidiki vane tarenda rebhora.
Svondo rino, Kavayi akaronga mutambo uchaona zvikwata zvevana vezera repuraimari zvichibandana pachikoro cheChiweshe Kakora Primary School apo zvikoro zvina zvichakwikwidza pamutambo weCoach Stanley Give Back to Community Under 14 Tournament.
Zvikoro izvi zvinoti Kakora Primary, Belrock Primary, St Albans Primary neKanyemba Primary. Muhurukuro, Kavayi anoti akavamba chirongwa ichi nechinangwa chekusimudzira nhabvu yevechidiki kumaruwa.
“Ini ndichishanda nemasan[1]gano akasiyana, takavamba chirongwa chekutenderera kuzvikoro zvekumaruwa tichironga mitambo yenhabvu nechinangwa chekusimudzira vatambi vechidiki.
“Kumaruwa kune vatambi venhabvu vane matarenda anonwisa mvura saka zvakakosha kuti tivapewo mukana wekusimukira mumutambo uyu nekuti ikoko kuchabva vanaPeter Ndlovu nanaKhama Billiat vemangwana. “Naizvozvo tiri kudana masangano akasiyana uye varairidzi venhabvu kuti vauye tibatane mubasa iri rekusimudzira vatambi vekumaruwa,” anodaro Kavayi.
Mutambo uyu uchaona vatambi vachadadisa vachiwaniswa mabhezari nemumwe mukotsveri, Gift Dennis, uyo anobva munzvimbo yeChiweshe asi ave kugara kunyika yeUnited Kingdom.
Nerimwe divi, kambani yeKuyamurana Furniture ichakotsvera nemukombe uyo uchazohwiniwa pamutambo uyu.
