Nhabvu yevechidiki yosimbaradzwa

13 Apr, 2023 - 14:04 0 Views
Nhabvu yevechidiki yosimbaradzwa Real Stars

Kwayedza

Abel Ndooka

MWAKA mutsva weMbare Junior Football League uri kubatsira kusimudzira nhabvu yevechidiki pamwe nekubika vatambi vemangwana.

Panguva iyo vamwe vatsigiri venhabvu vanoti vaneta nekuona “madhara” mazhinji achitamba muCastle Premier Soccer League, Mbare Junior Football League iri kubika vatambi vatsva.

Nzvimbo yeMbare inozivikanwa semusha wenhabvu munyika sezvo kuriko kwakabva vatambi vakaita mukurumbira vanosanganisira Japhet Mparutsa, George Shaya, Lloyd Katsvere, Garnet Muchongwe, Leo Ntawantawa naBenjamini Marere.

Masvondo matatu adarika – Mbare Junior Football League – yakabatana nevakotsveri vayo veKuyamurana Furniture, yange ichironga mitambo yemazera anoti Under-17, Under-15 neU-14 avo vange vachitatsurana kuStodart kuMbare, kuZimbabwe Grounds kuHighfield nekuDzivarasekwa Stadium.

Munyaradzi Taundi weKuyamurana Furniture anoti mitambo yavari kuronga iyi iri kubatsira kuona matarenda evatambi vanozotamba muPSL pamwe nekuenda kunze kwenyika mune remangwana.

“KuEurope vatambi vazhinji vanotanga kunetsa vasvitsa makore 16, 17 ne18 ekuberekwa vave kutotambira zvikwata zvakasiyana, saka isu muno ngatiite zvimwe chetezvo.

“Kuti tive nevatambi vanotanga kunetsa vachiri vadiki, zvinoda kuti tinge tichidira mari mumutambo uyu vatambi vobikwa vachiri vadiki.

“MuPSL taneta nekuona vatambi vamwe chete vachingochinja zvikwata, nhasi atambira chikwata ichi, mwaka unotevera ari kune icho.

“Saka zvoreva kuti hakuna vamwe vatambi vari kubikwa here?

“Ngatikoshese nhabvu yevechidiki, tikavabika zvakasimba nhabvu yedu inosimukira yosvika chaipo patinoshuvira kuti isvike,” anodaro Taundi.

Sachigaro weMbare Junior Football League – Stanley Kavayi – anoti Mbare musha wenhabvu saka vari kutsvaga vatambi vatsva vanotevera mumatsimba evatambi vakaita mukurumbira mumutambo uyu vakaita saShaya. Asi anoti kuti izvi zvigoneke, panofanirwa kuve nemushandirapamwe wakasimba pakati pemasangano akasiyana.

“Mbare inozivikanwa kubva kare uri musha wenhabvu wakabikwa vatambi vakawanda, saka isu tiri kushanda kuti tirambe tichibika vatambi vakawanda vemangwana.

“Nzira yega yatinohwina nayo kuti nhabvu yedu isimukire kushanda nevechidiki zvakasimba vopota vachishevedzwa kuzvikwata zvemuPSL.

“Isu basa ratiri kuita rekurairidza vechidiki vatinavo kuvagadzirira nzira yemangwana vazotambirawo muPSL nekuti mutambi wese wenhabvu nerimwe zuva anozodawo kutambira muPSL. Saka tinoda kuita mushandirapamwe wakasimba tisimudzire vechidiki vedu,” anodaro Kavayi.

Mumitambo yakarongwa masvondo adarika, chikwata cheReal Stars ndicho change chichingosimudza mukombe izvo zvakachiona chichihwina mitambo yakasiyana.

Share This:

Sponsored Links

We value your opinion! Take a moment to complete our survey