Mashudu Mambo
MURUME ane makore 35 okuberekwa wekuHwange, mudunhu reMatabeleland North, akapihwa chirango chekugara mujeri kwemwedzi gumi nemiviri nemhosva yekuteya mhuka dzesango.
Elias Munkuli akamiswa pamberi pemutongi wedare reHwange Magistrate Court achipomerwa mhosva yekutyora mutemo weTrapping of Animals Control Act. Akaramba mhosva iyi asi akarovererwa neumboo hwakaburitswa mudare.
Mwedzi mina yemutongo wake yakasendekwa parutivi kwemakore mashanu nechitsidzo chehunhu hwakanaka. Naizvozvo achagara mujeri kwemwedzi misere.
Dare rakanzwa kuti nomusi wa30 Chikunguru 2024, Munkuli nemumwe wake, uyo achiri kutsvagwa nemapurisa, vakasanganikwa navo nevanochengetedza mhuka vari pabasa apo mumwe wake akabva atiza.
Vachengetedzi vemhuka ava vakabva vatora mhara yaive yakafa, mapfumo maviri uye misungo yewaya makumi maviri nenhatu kubva kunaMunkuli.
Mhara iyi inokosha US$3 000. Nyaya iyi yakamhan’arwa kumapurisa zvikazoita kuti Munkuli asungwe.
