Kwayedza
Kingstone Mapupu
MUIMBI akamboita mukurumbira, Paradzai Mesi, uyo anotungamirira chikwata chake cheNjerama Boys, anonzi asungwa mushure mekuwanikidzwa achiba mune chimwe chitoro papurazi reHenstone riri kuGlendale mambakwedza anhasi China.
Mesi, uyo ane nziyo dzakaita mukurumbira makore ekubva kuma1980 kusvika kuma2000, anonzi asungwa apo aba muchitoro chaSabau chinotengesa masgirosari.
Mumwe munyeveri anoziva nezvenyaya iyi anogara papurazi reHenstone anoti Mesi ainwa doro muswere wese neChitatu kumashabhini ari mupurazi iri, ndokuzoguma aenda kunoba muchitoro ichi mambakwedza emusi weChina chino apo azotizwa nevamwe vaanga achiba navo.
“Paradzai Mesi – uyo anogara nemhuri yake kupurazi reKiyawora, makare muno muGlendale – akabva kumba kwake neChitatu ndokuswera achinwa doro mumashabhini ekupurazi reHenstone. Azonoba muchitoro chaVaSabau ndokuwanikidzwa arimo aunganidza magirosari ayo anga achitambidza vamwe vake kunze kwechitoro iye ari mukati.
“Ambogadziriswa nekurohwa nevanhu vazomunzwira tsitsi nekuti vanoziva kuti anorwara nechekare, ndokuzoendeswa pa’base’ remapurisa repapurazi reHenstone avo vazodarika naye kukamba yeGlendale uko kutaura kuno ari,” anodaro murume uyu.
Anonzi paawanikidzwa achiba, vamwe vaange achiba navo vabva vatiza ndokusara iye ari muchitoro.
Paradzai Mesi
“Tichitaura naye, Paradzai Mesi ari kuti atorwa nemakororo vaasingazive achibva kubhawa vakamumanikidza kunopinda muchitoro ichi vachibva vamuti akande zvinhu zvekuba kunze ivo vachitambira. Anoti semunhu anga akadhakwa, haana kukwanisa kurwisana nevanhu ava avo vazotiza apo vaona kuti vaonekwa. Ari kuti haasi mbavha, asi kuti ashandiswa nembavha dzamupamba,” anodaro murume uyu.
Vakafanobata chigaro chemutauriri wemapurisa kudunhu reMashonaland Central, Segearnt Major Samuel Chikasha, vanoti nyaya iyi haisati yasvika kumahofisi avo.
“Nyaya iyi pari zvino inongova runyerekupe kwatiri. Regai nditange ndataura nemapurisa edu ari panzvimbo, asi runyerekupe rwasvika rwuchidaro kuti Paradzai Mesi asungwa mushure mekuwanikidzwa achiba magirosari muchitoro,” vanodaro Sgt Major Chikasha.
Zvizhinji zviri kutevera.
