Kwayedza
Abel Ndooka
Aimbove muimbi weAfro-pop, Prince Kudakwashe Musarurwa, akarangarirwa nemusi weMuvhuro svondo rino nevamwe vaimbi vemisambo yakasiyana apo vakaita shoo yekupemberera hupenyu hwake kuCity Sport Bar muguta reHarare.
Musarurwa akashaika nguva pfupi yadarika mushure mekurwara negomarara uye akaradzikwa kumusha kwake kwaZvimba.
Muhurukuro neKwayedza, Yasina Dhala maneja wepaCity Sports Bar anoti rufu rwaPrince rwakarwadza vaimbi vazhinji sezvo akange achiri mudiki pamakore okuberekwa uye ane chiedza chakanaka chaive kumberi kwake.
Anoti shoo iyi vakaironga kuti vaimbi vakakundikana kuenda kurufu rwake kunobata maoko vawane mukana wekuzochema nevamwe vari pamwechete.
Yasin Dhala
“Prince akatirwadza nekutisiya kwaakaita, muimbi ange ane chiedza chakanaka kumberi kwake. Hapana aimbozvifungira kuti zvingadaro saka takangozvitambira kuti ndizvo zvaitika.
“Nekudaro isu takaronga tikaunganidza vaimbi vakawanda nekuchimbidza kuti vauye tigopembera pamwe hupenyu hwaPrince. Tinotenda vaimbi vakakwanisa kuuya tikabata tiri pamwechete,” anodaro Dhala.
Vaimbi vakakwanisa kuridza pashoo iyi vanosanganisira Ammi Jamanda, Loveness Mainato, Twin Lion naPax Gomo.
Musarurwa vazhinji vanomuziva nekambo kaakaita naPah Chihera ako kakanetsa zvikuru kanonzi “Runonzi Rudo”kozoti “Gogodera”.
