PSL yadzoka

28 Feb, 2023 - 16:02 0 Views
PSL yadzoka Kudzai Bare

Kwayedza

Abel Ndooka

MWAKA mutsva weCastle Lager Premiership uchatanga musi wa18 Kurume apo pachatanga rwendo rwutsva rwekurwira mukombe wePSL.

Mumutambo wekutanga wemwaka mutsva wa2023, shasha dzePSL, FC Platinum dzichatanga kurwira kuchengetedza mukombe uyu apo vachatatsurana nevakomana vatsva vachangopinda muPSL veSimba Bhora mumutambo uchatambirwa munhandare yeWadzanayi Stadium, kuShamva kunova kumuzinda mutsva weSimba Bhora.

Simba Bhora mumwaka wayo wekutanga muPSL ichange ichirairidzwa naTonderayi Ndiraya uyo akapesana neDynamos pakapera mwaka wegore radarika.

Ndiraya ane basa guru mwaka uno rekuona kuti Simba Bhora yaramba iri muPSL pachapera mwaka wa2023.

Chikwata cheChicken Inn ‘Gamecocks’, avo vakapedza vari pechipiri mwaka wadarika, chichatanga mwaka wacho nekusangana nevakomana vatsva vapinda muPSL veSheasham avo vanotarisirwa kunge vachishandisa nhandare yeBata Stadium iri kuGweru mwaka uno.

Sheasham ndiyo yakahwina tikiti rekuCentral Region Soccer League mwaka wadarika uye iri muPSL kekutanga munhoroondo yayo.

Dynamos ‘DeMbare’, iyo yakapedza iri pechitatu mwaka wadarika, ichashanyira Hwange FC ‘Chipangano’ kuColliery mumutambo wayo wekutanga wemwaka uno.

Chipangano yakadzoka zvekare muPSL umo yainge yakaburitswa mugore ra2019.

Mune mimwe mitambo ichatambwa svondo rekutanga, Highlanders ‘Bosso’ ichage iri pamusha apo ichasangana neZPC Kariba kuchiti CAPS United ichatamba neManica Diamonds.

Mukushi wemashoko wePSL – Kudzai Bare – anozivisa kuti nhandare mbiri dzinoti Ascot Stadium, kuGweru neVengere Stadium, kwaRusape dzose mwaka uno hadzisi kuzoshandiswa kutambirwa mitambo yePSL sezvo dzakatadza kusvika padanho rinotenderwa reZIFA Club Licensing First Instance Body.

“Tinoziva kuti Ascot Stadium neVengere Stadium dzatadza kuwana zvinotenderwa neZIFA Club Licensing First Instance Body. Nhandare idzi hadzisi kuzotambirwa mitambo yePSL kusvika dzagadziriswa sezvinodiwa,” akadaro Bare.

Share This:

Sponsored Links

We value your opinion! Take a moment to complete our survey