Kwayedza
Daphne Machiri
CHIKORO cheSt Johns Chikwaka chiri kuGoromonzi chiri kurumbidza bepanhau reKwayedza nekubatsira kwariri kuita vana muzvidzidzo zvavo zveShona, kunyanya avo vanenge vatarisana nekunyora bvunzo dzeGrade 7, dzeFomu 4 kana Fomu 6.
Muhurukuro, Mai Estery Tayimo – avo vanova murairidzi weShona pachikoro ichi – vanoti Kwayedza iri kuvabatsira zvakanyanya mukufambira mberi negwaro idzva refundo rinodaidzwa kuti New Curriculum.
“Tiri kubatsirikana zvakanyanya nekuda kwekuti mabhuku okushanda nawo pasi pechirongwa chegwaro idzva refundo mashoma. Naizvozvo Kwayedza iri kutibatsira kuti vana vadzidze ChiShona chakanaka,” vanodaro.
Mai Tayimo vanoenderera mberi vachiti, “ChiShona chatinowana chinosanganisira nhetembo, ongororo yemabhuku, kunyora ChiShona chakanaka zvichisanganisira nzwisiso, rondedzero, tsumo, ngano, ruvaranomwe nemadimikira.”
Vanoti vave nemakore akawanda vachidzidzisa vana Shona uye vanonzwa manyukunyuku sezvo uri iwo mutauro werurimi rwaamai.
“Ndave nemakore anosvika gumi nematanhatu, ndinodzidzisa magwaro maviri anoti O- neA-Level. Chidzidzo cheShona chinonakidza nekuda kwekuti mamwe mabhuku anoverengwa nevana vechikoro anopa nhaurirano ine pundutso mukuvaka upenyu neremangwana ravo,” vanodaro Mai Tayimo.
Vanoti gore rapera vadzidzi vavo veA-Level vakapasa bvunzo dzeShona nechikamu che100 percent, kuchitiwo veO-Level ndokupasa ne97 percent.
“Tinoda kuramba tiri pachidanho chepamusoro ichi, hakuna mwana dofo muchikoro asi kuti isu vadzidzisi tiripo pakuvabatsira.
“Zvakare, ini semudzidzisi handitarisire kuti kune mwana wechikoro angatadze kunyora pamwe nekuverenga Shona, unova mutaro wemazuva ose,” vanodaro.
