Abel Ndooka
SHASHA dzakambonetsa munhabvu dzichitambira zvikwata zvakasiyana – Nyasha Chazika naTawanda Nyamandwe – vosimudzira vechidiki vane tarenda remutambo uyu munzvimbo dzinosanganisira Mbare, muguta reHarare.
Vaviri ava vari kurairidza chikwata cheKuyamurana Football Club icho chinokwikwidza muHarare Province Junior Football League pamwe neMbare Junior Football League. Chazika akambotambira Dynamos FC uye akaita kaputeni wechikwata ichi pamwechete newemaYoung Warriors.
Nyamandwe akaita mukurumbira kuzvikwata zvinosanganisira CAPS United neHarare City.
Chikwata cheKuyamurana FC chakavambwa gore radarika naMunyaradzi Taundi uye chine zvimwe zvevechidiki vemazera anoti Under 8, 10, 12, 16 ne18 kozoita cheKuyamurana Senior Team icho chinokwikwidza muNational Stodart Soccer League.
Muhurukuro, Chazika anoti chikwata chavo chiri kushanda basa guru rekurwisa kutorwa kwezvinodhaka munzvimbo yeMbare.
Anoti shuviro yavo kuona vatambi vechidiki vavari kushanda navo vachizotambira zvikwata zvikuru zvakaita seDynamos FC, CAPS United neHighlanders uye nekuzoendawo kunotambira kuEurope.
“Isu seKuyamurana FC, donzvo redu kuona vechidiki vachisimukira munhabvu saka tiri kushanda basa guru rekuvasimudzira.
“Takaona kuti vechidiki vakasiiwa vakadaro vari vega vanopedzisira vafuririka votanga kutora zvinodhaka zvinokuvadza,” anodaro Chazika. Taundi anotiwo zvakakosha kuti masangano akasiyana asimudzire nhabvu yevechidiki.
“Tiri kukurudzira masangano akasiyana kuti huyai tiite mushandirapamwe tisimudzire vechidiki vedu nekuti vane tarenda rinonwisa mvura.
“Isu seKuyamurana takashanda kubvisa marara ayo airasirwa munhandare yeStodart kuitira kuti vechidiki vawane pekutambira. Saka iye zvino tave kuti vakotsveri huyai tishande pamwe tivandudze nhandare iyi isvike padanho repamusoro kuti vana vajaire kutambira munhandare yepamusoro kuitira pavanozoenda kuzvikwata zvikuru hazvizovanetsa,” anodaro Taundi.
Sachigaro wechikwata ichi – Oliver Sunday – anoti zvinoda mushandirapamwe wemapoka akasiyana kurwisa dambudziko rekutorwa kwezvinodhaka nevechidiki.
“Ngatishande zvakasimba kuona kuti vana vedu tavabvisa mune zvinodhaka nekuti tikangovasiya vachiita zvavanoda vanokanganisika,” anodaro.
