Abel Ndooka
VATAMBI venhabvu vakaita mukurumbira vari kukurudzirwa kuti vatore chikamu chikuru panyaya yekusimudzira mutambo uyu.
Kurudziro iyi yakaitwa naTechnical Director weZimbabwe Football Association (ZIFA) – Jethro Hunidzarira – achiti kuti nhabvu, kunyanya yevechidiki, isimukire shasha dzakambonetsa mumutambo uyu dzinofanirwa kushanda basa guru rekuvadzidzisa.
Achitaura nguva pfupi yadarika kuZimbabwe Grounds kuHighfield, muHarare uko kwaitambir wa mutambo weZIFA Harare Province Junior Football League, Hunidzarira anoti zvakakosha kusimudzira tarenda revechidiki sezvo vari ivo vatambi vemangwana.
“Patiri iye zvino kuti nhabvu yedu iende mberi, tinofanirwa kushanda nevakamboita mukurumbira mumutambo uyu avo tiri kudana kuti ngavauye vashande vabate basa rekusimudzira mutambo uyu.
“Shasha idzi dzine basa guru rekubata nekuti vanoziva zvinodiwa kuti nhabvu iende mberi uye vechidiki vabudirire.
Saka tinoda pfungwa dzavo nehunyanzvi hwavo zvibatsire vechidiki vatinavo vagoziva kuti chii chinodiwa kuti vagobudirira mumutambo uyu mune remangwana.
“Isu tiri kuda chaizvo kuona vechidiki vakawanda vachisvika kure nenhabvu naizvozvo tiri kushanda zvakasimba pamwe nekuita zvirongwa zvakawanda zvekusimudzira nhabvu. Vatambi vakaita mukurumbira vakatikoshera nekuda kweruzivo rwune hudzamu urwo vanarwo,” anodaro Hunidzarira.
