Kwayedza
Abel Ndooka
MUTAMBI wemaWarriors neReal Club Deportivo Mallorca — Tinotenda Philana Kadewere — akanyora nhoroondo nemusi weMugovera wadarika apo akaita wekutanga kubva muZimbabwe kunwisa muleague reSpanish LaLiga Santander.
Kadewere akanwisa apo chikwata cheRCD Mallorca chakakunda Villareal 4-2 kunhandare yeEstadi Mallorca Son Mix pamusha peRCD Mallorca.
Ndiye akatanga kunwisa mumutambo uyu watambwa maminitsi 20 uye vamwe vatambi vanoti Dani Rodriguez akanwisa kaviri naVedat Muriqi vakanwisawo kuMallorca, kuchiti vatambi veVillareal, Jose Luis Morales naSamuel Chukweuze vakanwisawo.
Kubva Kadewere aenda kuMallorca, akwanisa kutamba mitambo mitanhatu yemuLaLiga Santander.
Mutambo wesvondo radarika weVillareal ndiwo wange uri wekutanga Kadewere achitanga mutambo arimo uye akabva atenda murairidzi wake, Javier Aguirre, nekunwisa mumutambo uyu.
Mimwe mitambo mishanu yaange atamba muLaLiga Kadewere ange achitanga akagara pabhenji achizopinda mutambo wave pedyo nekupera ongotamba maminitsi mashoma.
Mumitambo yese yaatambira Mallorca, kusanganisira neyemukombe weCopa del Rey, Kadewere akwanisa kunwisa kaviri — kamwechete muLaLiga uye nekamwe chete kuCopa del Rey.
Tino Kadewere
Paakanwisa mumutambo weCopa del Rey, Mallorca yakakunda chikwata cheAutol 6-0.
Mutambo weVillareal uchangopera, Kadewere akapemberera kunyora kwaakaita nhoroondo apo akaenda papeji rake repaFacebook achiti vakahwinha zvine mutsindo.
“Tinotenda kuvatsigiri vese nezuro (Mugovera) maidadisa zvikuru #GodAboveAll #InGodWeTrust #historywasmade (nhoroondo yanyorwa).”
Zvichitevera kunyora kwaakaita nhoroondo uku, vatsigiri vazhinji venhabvu vakamhanya kukorokotedza Kadewere vachiti vari kuona chiedza chakanaka mune remangwana rake munhabvu.
Batsi Jawa akanyora kuti: “#historywasmade mukoma wekutanga, wekutanga, Tino ndiye aive wekutanga.”
Trust Chiuz anotiwo: “Ndinofara ndaona kuti wakanwisa, handina hangu kuona mutambo uyu asi pandaona kuti panwiswa kana (4) ndaziva chete kuti wanwisawo.”
Nicholas Munyonga anoti: “Tinoramba tichidada newe Warrior!”
Kuchiti Yotum Zulu anotiwo: “Ndakatanga kuona mutambo pawakanwisa, wakanwisa gobhora rinoyevedza chaizvo, ramba wakadaro chikomana!”
Tendai N Remhewa anoti: “Famba Tino Fambaaa”.
Zvakadai, kune vamwe vatambi vari kutambira kuEurope, kuEngland, Jordan Zemura akatamba maminitsi 85 apo chikwata chake AFC Bournemouth chakakunda Wolverhampton Wanderers 1-0.
Kuhwina kwakaita Bournemouth kwakaibatsira kuti imbofema sezvo iri kurwira kuti isaburitswe muPremier League mwaka uno.
Bournemouth pari zvino yakagara pechi17 palog uye yakangosiya West Ham nechibodzwa chimwechete iyo yakagara pechi18.
Panopera mwaka weEPL, zvikwata kubva pa18 kusvika pa21 zvinoburitswa muEPL saka Bournemouth inofanirwa kutokunya dzisimbe yoramba ichitora zvimwe zvibodzwa zvakawanda.
MuEnglish Championship, Marvelous Nakamba akatamba mutambo wake wechina apo Luton Town FC yakakundwa 1-0 neBurnely.
Mumutambo uyu, Nakamba akatamba mamitsi 68 ndokuzoburitswa akuvara.
Hazvisati zvazivikanwa kuti kukuvara kwake kwakakura zvakadini.
MuEnglish Championship zvekare, Tendayi Darikwa akatamba mutambo wese apo Wigan Athletic yakaita mangange 0-0 neNorwich City kunhandare yeDW Stadium pamusha weWigan.
Wigan ndiyo yakasenga iri pasi muChampionship ine zvibodzwa 31 kubva mumitambo 32 yayatamba.
Wigan inofanirwa kuhwina mitambo yayo inotevera kana ichida kuramba iri muChampionships nekuti payakamira hapana kunaka.
