Kwayedza
Kingstone Mapupu
N’ANGA nemaporofita vanoti havasi kuzosaririra kumashure muchirongwa chekubaiwa majekiseni ekudzvirira kuti vasabatwe nechirwere cheCovid-19 icho chakaparurwa neHurumende svondo rapera.
VaGeorge Kandiyero, avo vanova mukuru wesangano reZimbabwe Traditional Healers Association (Zinatha) iro rinomirira n’anga nemaporofita, vanoti vakaita musangano nenhengo dzavo padandemutande apo vazhinji vanoratidza kufarira chirongwa chekubaiwa majekiseni ichi.
“Takabvumirana nenhengo dzedu kuti tinofanirwa kubaiwa majekiseni aya kwete kumanikidzana, asi nechido chemunhu. Kune vasingakwanise vanorega zvavo, asi ruzhinji rwen’anga nemaporofita vakabvuma kuti vari kuzobaiwa,” vanodaro VaKandiyero.
VaKandiyero
Vanoti ivo sen’anga nemaporofita vanogara vachisangana nevanhu vakawanda vanoda kubatsirwa mumatambudziko akasiyana izvo zvinovaisa panjodzi yekutapurirwa kana kutapurira varapwa vavo Covid-19.
“Sezviri kuitawo vanamukoti, vanachiremba nevamwe vanoshanda neruzhinji, tinodawo kubaiwa majekiseni iwaya. Tine dzimwe n’anga dzine mhepo nemashavi asingapindirane nemishonga yechirungu uyewo nemaporofita akadaro avo vanosara zvavo. Havamanikidzwe sezvo mutemo uri kuti munhu haamanikidzwe kubaiwa.
“Shoko iri takaparidzira kunhengo dzedu dzeZinatha munyika dzinodarika 50 000,” vanodaro VaKandiyero.
Vanoti n’anga kana maporofita vakazivikanwa kuti vakabaiwa majekiseni ekudzivirira chirwere cheCovid-19, zvinoita kuti vanhu vanoda kunobatsirwa navo vaenda kwavari vakasununguka pasina kutya kutapurirwa denda iri.
“Vakawanda vari kuzvifarira vachiti zvinobatsira ivo semachiremba uyewo nevarwere vavo vanouya kumatare kana kumasowe kwavo,” vanodaro VaKandiero.
Madzibaba Gamba, VaMartin Madzura (36), vechechi yeKundiso yeVapositori Faith Apostolic iri muHarare vanoti vanotsigira chirongwa chekubaiwa kwemajekiseni ekudzivirira kuti vanhu vasabatwe neCovid-19.
“Isu tatomirira kubaiwa majekiseni aya semaporofita nevanamati vechipositori, idanho guru rekudzivirira chirwere ichi munyika yedu,” vanodaro Madzibaba Gamba.
Vanoti nyaya yekubaiwa majekiseni aya isarudzo yemunhu nekudaro havamanikidze vatendi vechechi kuti vabaiwe.
