Abel Ndooka
SACHIGARO webhodhi reDynamos FC — Bernard ‘Magitare’ Marriot-Lusengo — anoti chikwata chavo chinoda kupedzisa basa svondo rino apo chichasangana neZESCO United yekuZambia mumutambo weCAF Confederations 1st Preliminary Round return leg.
Svondo radarika, zvikwata zviviri izvi zvakasangana mumutambo wekutanga, uyo DeMbare yakahwina 1-0 kunhandare yeBotswana National Stadium, kuBotswana.
Nhandare iyi yaishandiswa nemaGlamoour Boys sepamusha pavo sezvo parizvino muZimbabwe musina nhandare dziri padanho rinotenderwa kutambirwa mitambo yeCAF neFIFA.
Zvikwata izvi zviri kusangana zvekare mumutambo wechipiri musi weMugovera uyo uchatambirwa pamusha weZESCO United kunhandare yeLevy Mwanawasa Stadium kuNdola, kuZambia. Chikwata chichahwina chinobva chafambira mberi mumutambo uyu kuenda ku2nd Preliminary Round uko chichanosangana nechichakunda pamutambo weForesters Mont Fleuri yekuSychelles neOrapa United yekuBotswana. Muhurukuro neKwayedza, Magitare anoti vari kugadzirira zvakasimba mutambo wavo uri kutevera neZESCO United.
“Munhabvu, munhu wese anototambira kuhwina uye isu zvatiri kuenda kuZambia tiri kuda kunopedzisa basa ratakatanga svondo radarika kuBotswana.
“Tinoziva hedu kuti achange ari makata chaiwo patiri kuenda kuZambia kumusha kweZESCO nekuti chikwata chiri pamba pacho chinenge chine rutsigiro rwakasimba uye vachitamba sevakasvikirwa vasingade kukundwa pamba pavo.
“Naizvozvo isu tinotofanirwa kutokwinya dzisimbe nekuti tiri kutodawo chaizvo kuenda mberi mumutambo uyu,” anodaro Magitare.
Pakapera mutambo wekutanga wezvikwata zviviri izvi kuBotswana, DeMbare yakaramba iri kunyika iyi ichiita gadziriro dzekuzosangana neZESCO United.
“Takaona kuti zviri nani chikwata chedu chirambe chiri kuBotswana chiite gadziriro dzemutambo uyu chiriko chozobva chichienda kuZambia kunosangana neZESCO United.
“Isu takazviona zvakanaka zvakadaro uye ndizvo zviri kutotishandira,” anodaro Magitare.
Zvakadaro, Ngezi Platinum Stars iri kutambawo svondo rino apo ichasangana neAS Maniema Union yekuDemocratic Republic of Congo.
Zvikwata zviviri izvi zvakasangana svondo radarika kunhandare yeNational Heroes Stadium, kuZambia mutambo wacho ndokupera uri mangange 0-0.
Svondo rino, chikwata chaTakesure Chiragwi chiri kufanirwa kutosunga dzisimbe kuti chihwine uye chiende ku2nd Preliminary Round.
Kana Madamburo, sezita remadunhurirwa reNgezi Platinum Stars, ikabudirira kukunda AS Maniema Union svondo rino inenge yakamirirwa neAtletico Petroleos de Luanda yekuAngola ku2nd Preliminary Round.
Nerimwe divi, chikwata ichi kana chikahwinha mutambo uyu zvekare chinobva chafambira mberi kuenda kumaGroup Stages.
