Vana vechikoro vobatsirwa

11 Oct, 2019 - 00:10 0 Views
Vana vechikoro vobatsirwa Prophetess Memory Matimbire vachipa laptop kuna Takunda Mudonhi wepaMarondamashanu Secondary School apo Mambo Nyoka VaMusafare Matizha, naVaLiberty Maweni vanove Schools Inspector weChikomba West vainge vakatarisa.

Kwayedza

Malven Mugadzikwa
SANGANO remubatanidzwa wemadzimai anobva kumachechi akasiyana muZimbabwe, reDaughters of Virtue (DOV), rinoti vana vanodzidza kumaruwa vanofanira kuwana fundo yakafanana nevari muzvikoro zvemumadhorobha nemaguta, kunyanya munyaya yekushandiswa kwemakombiyuta nemimwe michina yechizvino-zvino.

Kurudziro iyi yakapihwa nemukuru wesangano iri, Prophetess Memory Matimbire, svondo rapera apo vakagashidza zvekushandisa mudzidzo kuvana vepachikoro cheMarondamashanu Primary neMarondamashanu Secondary, kuChivhu.

Sangano iri rakapa vana ava zvinosanganisira mabhuku ekuverenga neekunyorera, zvinyoreso, malaptop, tablet, mabhasikoro nemayunifomu.

Prophetess Matimbire vanoti vakapa malaptop netablet nechinangwa chekukurudzira vana vekumaruwa kuti vafambirane nechizvino-zvino mukudzidza kwavo.

“Mazuva ano nzira dzekudzidza kuvana vechikoro dziri kurerutswa kuburikidza nechizvino-zvino uye kushandiswa kwemakombiyuta. Tiri kuona chero bazi redzidzo riri kukurudzira vana kuti vashandise chizvino-zvino mukutsvaga ruzivo rwunobatsira kusimudzirwa kweupfumi hwenyika. Izvi zvinogoneka chete kana vana vachigona kushandisa makombiyuta kubva vachiri kuchikoro,” vanodaro.

Vanoti chakanyanya kuvapa shungu yekubatsira vana vechikoro vekumaruwa mayarukiro avakaitawo ivo vachiita upenyu hwekutamburira.

“Ndakakura ndichiti ndinofanira kubatsira vana vekumaruwa, kunyanya pazvikoro zvandakadzidza nekuti makombiyuta handina kukura ndichiziva mashandisirwo awo. Ndine chishuviro chekuvaka dzimba dzekudzidzira makombiyuta kuti vana vekumaruwa vakure vachifambirana nechizvino-zvino,” vanodaro.

Vanoenderera mberi vachiti, “Ndapawo rubatsiro rwemabhasikoro uye mayunifomu kuvana vanobva kumhuri dzisingawani zvakakwana nevanofamba nzendo refu kuuya kuchikoro. Kune vana vanofamba mitunhu yakareba vachiuya kuchikoro. Iri idambudziko guru.”

Prophetess Matimbire vakabatsirawo vana zana nemari yechikoro uye pavana ava, 60 ndevekusekondari kuchitiwo 40 vari kupuraimari.

Mukuru weMarondamashanu Secondary School, VaDouglas Mazumba, vanotenda sangano reDOV nerubatsiro urwu.

“Pachikoro pedu hatina makombiyuta saka malaptop netablet zvichabatsira zvakanyanya mukurerutsa kudzidza kwevana nekuti vava kukwanisa kutsvagawo zvinhu padandemutande. Izvi zvinobatsira vana kuti vawedzere njere uye kugona muchikoro.

“Kumaruwa tinewo dambudziko revana vanoshaya asi kubhadharirwa mari dzechikoro zvinovapa shungu,” vanodaro.

Share This:

Sponsored Links

We value your opinion! Take a moment to complete our survey