Kwayedza
Abel Ndooka
VANHU 12 vasungwa nemhosva dzine chekuita nemhirizhonga yakaitika kunhandare yeBabourfields, kuBulawayo, nemusi weSvondo wadarika apo vatsigiri veHighlanders vakapinda munhandare vachinyunyuta kuti chikwata chavo chainge chanyimwa pena apo chaitamba neDynamos.
Mutauriri wemapurisa munyika – Assistant Commissioner Paul Nyathi – vanoti pavanhu 12 vasungwa ava, vamwe vari kupomerwa mhosva yekufamba nezvombo zvinokuvadza zvinosanganisira pfuti.
“Zimbabwe Republic Police inozivisa veruzhinji kuti tsvakurudzo iri kuitwa yekutsvaga wose ane chekuita nemhirizhonga iyi,” vanodaro Ass-Comm Nyathi.
Vatsigiri veBosso vakatangisa mhirizhonga iyo yakazokonzera kuti mutambo uyu umiswe wangotambwa maminitsi 38 apo Dynamos yaitungamira 2-0.
